Zentroa ireki zenetik Tabakaleran egin den erakusketarik handiena izango da, 1.500 m2-ko erakusketa-eremuarekin, ibilbide zirkularra osatuz.

Beste batzuen artean, Francisco de Goyaren Los disparates, Fernand Legerren La creación del mundo eta June Cresporen Régimen Diurno (Brigitte) lanek eta Tabakalerako ekoizpen berriek osatuko dute erakusketa.

Tabakalerak eta Arte Ederren Bilboko Museoak That Time. Artearen aroak. Tabakalera-Bilbao Museoa erakusketa aurkeztu dute. Bi erakundeek erakusketa-proiektu batean parte hartzen duten lehen aldia da. Lankidetza horri esker sortu da proiektu hau, Arte Ederren Bilboko Museoaren bildumaren zati garrantzitsu batekin, eta egitasmo honetarako bereziki sortutako eta Tabakalerak ekoitzitako artelan berriekin osatuko dena.

Erakusketa 2023ko ekainean inauguratuko da, eta urte horretako abendura arte egongo da ikusgai, Arte Ederren Bilboko Museoaren handitze-lanek irauten duten bitartean. 60 obra baina gehiago egongo dira ikusgai bertan, eta horien artean maisulantzat jotzen diren hainbat pieza. Artelanak Bilbotik Donostiara etorriko dira, museo bateko bildumatik sorkuntza garaikideko zentro batera, ohiko ibilbidearen alderantzizko bidaia batean.

2015ean inauguratu zenetik Tabakalerak hartuko duen erakusketarik handiena da. 1.500 m2-ko erakusketa-gunea izango du, erakusketa-eremua 500 m2 baino gehiago handituko baita, horrela, ibilbide zirkularra sortuz lehen solairuan zehar.

That Time. Artearen aroak. Tabakalera-Bilbao Museoa erakusketak Samuel Beckett eleberrigile eta antzerkigileak 1974ko ekainaren 8tik 1975eko abuztura ingelesez idatzi zuen That Time obra du abiapuntu. Gaztelaniaz "Aquella vez" izenburupean argitaratu zen lan hori. Obrak hiru ahots ditu, eta horiek, aldi berean, hiru denboratara garamatzate. Ahots horiek ikuslea denboraren hiru alderdiren aurrean jartzeko bertutea izango lukete, orainaren ideiarekin erraz uztar daitezkeenak: iraganaren oraina, orainaren oraina eta etorkizunaren oraina.

Becketten denbora ziklikoaren ideia positibismoaren denbora linealari egindako kritikarekin bat dator, hein handi batean artearen historiografiak bere bertsio ospetsu eta bermasterizatu garaikideetan bere gain hartzen baitu. Alde horretatik, That Time erakusketak proposatzen du bisitariak hainbat obraz gozatu ahal izatea, aldi baterako jauziak, etenak eta gurutzatzeak hobeto ulertzen laguntzen dutenak, behin-behinekotasunaren esparruan gertatzen direnak, eta inola ere ezin dira norabide bakarreko aurrerapen gisa deskribatu. Ildo beretik, erakusketak hartuko duen espazioak denboraren zirkulartasunaren ideia indartuko du erakusketa bisitatzeko esperientziatik bertatik hasita.

Erakusketaren komisarioak bi erakundeetako lantaldeetako kideak dira: Miriam Alzuri, Arte Ederren Bilboko Museoko Arte Moderno eta Garaikidearen Kontserbatzailea, eta Oier Etxeberria, Tabakalera Kultura Garaikidearen Nazioarteko Zentroko Programa Publikoaren arduraduna.

Irekiera 2023ko ekainean izango da, eta erakusketa sei hilabetez bisitatu ahal izango da. Jarduera-programa zabala izango du, bisitak eta hitzaldiak barne, eta denboraren ideian eta artearen historian jarriko da arreta.