Abenduaren 13an eta 14an, Tabakalerak ateak irekiko ditu normalean itxita dauden ateez bestalde gertatzen dena bistaratzeko. Asteburuan zehar interesa duen edonork aukera izango du kultura garaikideko zentroaren txokoak arakatzeko, Artisten Gunea eta bertako egonaldi-programari esker lanean ari diren sortzaileen jarduna ezagutzeko eta askotariko ekintzetan parte hartzeko.

Erakusketetatik hasi eta sorkuntza-tailerretaraino, bertako eta nazioarteko artistekin hitzaldiak, zuzeneko ikuskizunak eta askoz aukera gehiago ere izango dira. Ate irekien asteburuak Tabakalera definitzen duen mundu artistiko eta kulturalaren ikuspegi osoa eskainiko du.

Asteburuko programazioa

Ostiraleko jarduera-programa Elías Querejeta Zine Eskolan hasiko da bertako ate irekien jardunaldiarekin. Eskolak bere jarduera zinematografikoa eta ikertzailea ireki, ikusarazi eta zabaltzeko programa prestatu du, eta EQZEren proiektua ezagutaraztea du helburu, baita azken urteotan eskolan ekoiztu diren eta munduko zinemaldi garrantzitsuenetan estreinatu diren zenbait lan aurkeztea ere.

Arratsaldean, Tabakalerako Artisten Guneak bere ateak irekiko ditu bertako artista egoiliarren estudioak bisitatzeko parada eskainiz. Andrea Aguilera, Miren Bayona, Cesare Botti, Alba Fernández, Maria García Marraco, Zuriñe Mariño, Mar Reykjavik, Ainize Sarasola, Emmy Skensved eta Noa Verkeyn sortzaileen jarduna bertatik bertara ezagutzeko modua izango da.

Ate irekien bi egunetan, abenduaren 13an eta 14an, publikoak gune horretan lanean ari diren artistak ezagutzeko aukera izango du, bai eta egonaldi-programen bidez garatzen ari diren proiektuak ere. Programa propioak –ikus-entzunezko laborategian garatzen direnak, esaterako – zein beste erakunde batzuekin elkartrukerako edo lankidetzarako proiektuen emaitzak izango dira bertan aurkeztuko direnak.

Abenduaren 14an, larunbata, 3. solairuko beste gune batean, Eginzaleak! 2024 "egitearen" kulturari buruzko topaketa izango da, non teknologiaren, sormenaren eta ezagutza partekatuaren inguruko lankidetza praktikak biltzen diren urtero. Aurten, Eginzaleak! ekimenaren edizioa Food Hack Lab-ekin lankidetzan egingo da, elikaduraren balio-kate osoan esku hartzen duten teknologiak aztertzen dituen talde irekiarekin. Testuinguru horretan, jardunaldia hiru gai-multzotan egituratuko da egun osoan zehar (11:00-14:00/17:00-20:00), Antonio Scarponi, Domingo Club (Maud Bausier eta Antoine Jaunard), Lara Campos, Juan Righetti edo Paula Franco Hernaniren parte-hartzearekin, besteak beste. Gainera, Eginzaleak! ekimenean tailerrak egingo dira -baita familientzat ere- eta elikadurari, iraunkortasunari eta lankidetzari buruzko solasaldia.

Tabakalerako zinemak ere bat egingo du Ate irekien asteburuarekin eta zinema ikasleen lanak ikusteko saio berezia eskainiko ditu. Nest 2024 topaketaren film labur irabazlea ikusi ahal izango da eta aurtengo edizioko making of-a ere aurkeztuko da. Nest Donostia Zinemaldiko mundu guztiko zinema-eskoletako ikasleei zuzendutako film laburren lehiaketa-saila da Tabakalerarekin elkarlanean antolatua. Elías Querejeta Zine Eskolako ikasleek zuzendutako bi film laburrek osatuko dute programa: Julen Etxebarriaren El tercer paisaje eta Mário Velosoren Chuvas de verão.

Musika ere izango da Tabakaleraren Ate irekien asteburuan. DJ N4JU arduratuko da Artisten Gunea girotzeaz, eta larunbatean, hilak 14, Tabakalerako Prisman Putas Amak-en eta LaMia Mariren kontzertuekin itxiko da ekitaldia. Sarrera librea da.

Ate irekien asteburu hau esperientzia aberasgarria izango da bertaratutako guztientzat, Tabakaleraren bihotzean sorkuntzaren mundu liluragarrian murgilduz.

PROGRAMA

OSTIRALA 13

• 10:00-18:30 | EQZE ATE IREKIEN EGUNA | 0 solairua
• 17:00-20:00 |LANTEGI IREKIAK |3. solairua
• 18:00-20:00 | DJ N4JU

LARUNBATA 14

• 11:00 - 14:00 / 17:00 - 20:00 | LANTEGI IREKIAK |3. solairua
• 18:00 - 19:30 | DJ N4JU
• 19:30 - 20:30 | Performancea: La Fiesta, Marc Vives
• 11:00 - 14:00 / 17:00 - 20:00 | EGINZALEAK! 2024 | 3. solairua
• 11:30 - 13:00 (EU) | Familientzako lantegia | Arrautza oskolak lorontzi bihurtu (familiak + 5 urte)
• 12:00 - 13:30 (ES) | Lantegia |Tempeh etxean egiten ikasi
• 18:30 - 19:30 (EN) | Solasaldia |The Maker's Table: Elikadura, jasangarritasuna eta kolaborazioa
• 19:00 |NEST PROIEKZIOAK |1 solairua
• 20:30 - 22:30 |Musika |Putas Amak + LaMia Mari |5. solairua