Donostiako Gizarte Kontseiluak osoko bilkura egin zuen joan den ostegunean, abenduaren 11n eta bertan, araudi organikoak ezartzen dituen karguak berritzeaz gain, Herritarren Ekimen Onenari III. Gizarte Kontseiluaren Sarietan finalista izan diren ekimenei garaikurrak banatu zizkieten. Horien artean dago Harrotu ileak, duela ia 10 urte gazteen, artisten eta Kultura Garaikideko Nazioarteko Zentroaren arteko lankidetzarako gune gisa sortu zen Tabakaleraren proiektua.

Hirian modu altruistan sortzen diren herritarren ekimenak ezagutarazteko eta haien balioa nabarmentzeko, hiriko Gizarte Kontseiluak Gizarte Kontseiluaren Sariak banatu ditu duela hiru urtetik. Sari horiek eskertu eta ikusgarritasuna eman nahi die hiriko hainbat kolektibori laguntza ematen dieten, herritarren arteko sareak ehuntzen dituzten eta Donostia hiri adiskidetsuago eta integratzaileago bihurtzen duten proiektuak.

Harrotu ileak, Tabakaleraren ekimen finalista topaketarako, sorkuntzarako eta eztabaidarako gune hibrido gisa sortu zen, epe luzerako proiektu-ikuspegiarekin, eta erreferente bihurtu da hirian kalteberatasun-egoeran bizi diren Donostiako gazte askorentzat.

2015ean, Tabakalerak sorkuntza-gune bihurtuta ateak ireki zituenean, lantaldea gogoeta egiten hasi zen bertako erabiltzaile gazteekin batera lan egiteko aukeren inguruan. Nola sentitzen ziren zentrora zetozen gazteak? Zer harreman zuten eraikineko espazioekin? Nola erabiltzen zituzten, nola bizi zituzten? Zein erreferente kultural zeuzkaten?

Hasierako galdera horietatik abiatuta, ostiralero Tabakalerara joaten zirenen beharrak aztertu zituzten: Donostiara iritsi berriak ziren eta kalteberatasun- eta arrazakeria-egoerak bizi zituzten pertsonak.

Testuinguru horretan sortu zen Harrotu ileak, lehenik eta behin CAPP (Collab Arts Partnership Programme -Artea testuinguru sozial eta komunitarioetan-) egonaldi artistikoen deialdiak babestutako proiektu gisa, eta, 2017tik aurrera, Tabakalerako bitartekaritza-arloko proiektu gisa.

Proiektuak, alde batetik, espazio seguru eta lasai baten beharrak betetzen ditu; ostiral arratsaldeetan finkatutako harreman-espazio bat. Bestalde, praktika artistikoetatik abiatuta, lanerako espazio bat eskaintzen du. 2017az geroztik, bideoak, dantzak, rapak, argazkigintzak, zinemak, pinturak edo antzerkiak zuzenean eragiten dieten gaiak jorratzeko aukera eman die parte-hartzaileei. Esparru publikoan justizia sozialari lotutako gaiak bereziki. Prozesu horiek tokiko sortzaileekin lankidetzan egiten dira, eta proiektuan parte hartu duten artisten zerrenda luzea da. Besteren artean, Maria Zapata antropologoa eta arte eszenikoetan aditua, edo Juantxo Arakama, Mursego, Javi Pez edo Telmo Trenor musikariak.

Harrotu ileak, beraz, gurutzaketa kultural eta identitarioen eta guztiontzako eskubide kulturalen beharra azpimarratzen duen proiektua da, eta Tabakalera bezalako erakunde kulturalek gizartean eragin dezaketen prozesu kultural eta artistikoen bultzatzaile izaten jarraitu behar dutela nabarmentzen du.

Donostiako Gizarte Kontseiluaren Sarien III. Edizioa

Donostiako Gizarte Kontseiluak 2022an sortu zuen "Herritarren ekimenik onenaren Gizarte Kontseiluaren Saria", Donostiako herritarrei eragiten dien edozein arlotan garatutako egitasmoei zuzendua. Horien artean, hiriarentzat lehentasunezkotzat definitutakoak leudeke (adinekoak, belaunaldien ordezkoak, immigrazioa eta donostiar berriak, klima-aldaketa eta auzoak). Saria urtero ematen da eta ekimen irabazlearentzako diploma bat eskaintzen da eta bi finalista izendatzen dira.

Sarien hirugarren deialdira 8 proiektu aurkeztu ziren, hirirako lehentasunezkotzat jotako arloetan lan egiten dutenak: Adinekoak, Belaunaldi aldaketa, Immigrazioa eta donostiar berriak, Klima aldaketa eta Auzoak.

Hauek izan ziren hautagaiak:

• Tantaka - Banco de Tiempo Solidario, Tecnun Nafarroako Unibertsitateko Ingeniaritza Eskola.
• Argibusa, Dbus Donostia.
• Begirada aktiboa, Intxaurrondo Zaharreko Jubilatuen Etxea.
• Etxealdi, Gipuzkoako Caritas.
• Harrotu Ileak, Tabakalera.
• BCC Innovation, Basque Culinary Center.
• Zaporeak, Intxaurrondoko Gastronomia Elkartea.
• Askapenerako sukaldaritza, Basajaun Elkartea.

Gizarte Kontseiluko Batzorde Iraunkorreko kideek osatutako epaimahaiak lehenengo saria Tecnun Unibertsitateko Tantaka proiektuari eman zion, bigarrena Harrotu ileak proiektuari eta hirugarrena Gipuzkoako Caritaseko Etxealdi elkarteari.

Eneko Goia alkateak diploma eman zien Edurne Ormazabal Tabakalerako zuzendariari, Itziar Imaz zentroko Hezkuntzako arloko arduradunari eta Fouad Redjali eta Soufian El Mossaoui parte-hartzaileei. Redjalik eta El Mossaouik eskerrak eman zituzten: "Harrotu ileak migrazio prozesu zailak bizi izan ditugunontzat topagunea da. Hemen, ezbeharrak ahazteko harrera-gune bat aurkitzen dugu ".