Emma Kunz. Bide urratzaile bat arte garaikidearekin solasean 2022ko lehen seihilekoan ikusgai egon zen erakusketa Espainiako arte garaikideko onenen artean kokatu dute, bai komunikabide orokorrek, bai arte garaikidean espezializatutakoek. Tabakalerara hurbildu ziren 20.000 bisitariek Suitzako ikertzaile eta naturopataren atzera begirako historikoa ikusteko aukera izan zuten, nazioarteko eta tokiko 18 artista garaikideren lanekin elkarrizketan. Horien artean zegoen Nora Aurrekoetxea artistaren Diva obra, 2022ko Gure Artea sorkuntza-jardueraren saria. Datu horiei Situ-akzioak. Emma Kunz familientzako proposamenarenak gehitu behar zaizkie, 22.000 bisitarira iritsi zena.

Emma Kunz amaitu ondoren, Vive le cinéma! erakusketak asistentzia-datu nabarmenak eskaintzen jarraitu du, eta, gaur arteko datuak kontuan hartuta, 21.700 bisitari baino gehiago izan ditu. Backstage: Get In 1991-2021 eta Imajinatu Zinemaldia-k, Donostia Zinemaldiaren 70 urteko ibilbidea gogora ekartzen duenak, 20.000 eta 22.700 bisitari izan dituzte, hurrenez hurren.

Argazkilaritzari dagokionean, Kutxa Kultur Arteguneko erakusketek- Bego Antón. Sorginak, txakurrak, elfoak eta beste errealitate fantastiko batzuk, Unai San Martin. Nostos, Ruth Orkin. Denboraren ilusioa eta Promesen testura -40.500 bisitari izan dituzte.

Bestalde, Eusko Jaurlaritzaren Eremuak programako Hamahiru erakusketa kolektiboak, bertako hamahiru artistaren obrak biltzen zituenak, 5.500 pertsona izan zituen ikusgai egon den bi hilabeteetan. Publikoaren babesa jaso dute, halaber, Lau Pareta aretoan egindako biek ere: Une musique intérieure (5.000 bisitari) eta Gerundi circular (10.100 bisitari).

Parte-hartzea eta posizionamendua hobetzea

Erakusketez gain, Tabakalerak oso zifra positiboarekin itxi du urtea, jendearen parte-hartzeari dagokionez: programazioak 2021ean baino % 70 parte-hartzaile gehiago erakartzea lortu du. Guztira, 320.000 pertsonak hartu dute parte zentroak aurten egindako kultura-eskaintzan, eta 700.000 bisitari izan ditu guztira.

Halaber, bereziki garrantzitsuak dira Medialabek lortutako zifrak, Tabakalerara hurbiltzen diren pertsonen sarrera-ate nagusia izaten jarraitzen baitu. 156.650 pertsona hurbildu dira sorkuntza-liburutegia eta teknologia eta kultura digitaleko laborategia biltzen dituen erreferentzia-gune horretara.

Bestalde, kultura garaikidearen zentroak aurrerapen handia egin du EAEn, garrantziari eta posizionamenduari dagokienez. Eusko Jaurlaritzako Prospekziorako Kabinete Soziologikoak berriki egindako Euskal Soziometroaren balorazioak adierazten du Euskal Autonomia Erkidegoko biztanleen % 72k ezagutzen dutela Tabakalera. Datu hori % 95era arte hazi da Gipuzkoako inkestatuen kasuan. Horietatik erdiek diote kultura garaikideko zentroa bisitatu dutela azken urtean.

Bestalde, 2022a urte bikaina izan da Tabakalerako espazioetan egindako ekitaldi publiko zein pribatuen ikuspegitik. Ekitaldiak eta kongresuak egiteko espazioen eta zerbitzuen alokairuak bere marka historikoa hautsi du 68 ekitaldirekin, eta aurreko urteko irabazien zifra % 52 igo da.

Azkenik, 2022ko abenduaren 22an, KGNZ Tabakalera SAren Administrazio Kontseiluak bilera egin zuen, eta 2023ko ekitaldirako gastu arruntaren aurrekontua onartu zuen. Hirugarren urtez jarraian, Administrazioen ekarpena 5.070.000 €-tan mantendu da, eta 2023ko gastu-aurrekontua 7.548.000 €-koa izango da, hau da, % 11ko igoera 2022ko aurrekontuarekin alderatuta, energia-kostuen garestitzearen ondorioz. Bestalde, diru-sarrera propioen aurrekontua % 40 igo da aurreko ekitaldiarekin alderatuta, eta autofinantzaketa-ratioa % 27koa izan da, 2022koa baino 4 puntu handiagoa.