Artium Museoak EITBrekin batera ekoiztutako bi lan dokumentalen aurkezpena egingo du ostegun honetan, martxoaren 26an, 18:00etan, Emanaldi aretoan. Joan den uztailean iragarri zen bezala, bi erakundeen arteko lankidetza-esparruaren helburua publiko berrien artean Euskal Herriko kultura garaikidea zabaltzen lagunduko duten kalitatezko ikus-entzunezko edukiak sortzea da. Orain aurkezten diren piezak museoaren eta EITBren profesionalek osatutako lantalde batek garatu ditu, eta Begira Produkzioak ekoiztetxeak ere bat egin du lantaldearekin. Gutxi gorabehera ordubeteko iraupena duten bi dokumental dira, bi artisten ibilbideak eta azken hamarkadetan arte garaikidearen panoraman egindako ekarpena modu monografikoan aztertzen dituztenak. Piezak Parisen, Madrilen eta Menagarain (Araba) filmatu dira, artisten estudioak dauden tokietan.

erresonantziak EITBk eta Artium Museoak garatzen duten lankidetza-proiektuan sartzen da, Euskal Herriko testuinguruan publiko berrien artean kultura garaikidearen dibulgazioan urrats bateratuak emateko helburuarekin, artisten lana hedatzeko plataforma gisa baliatuz eta egungo gizarteak dituen beharrei eta erronkei erantzuteko sorkuntza garaikidetik ondorioztatzen diren balioak bultzatuz. Lankidetza hori proiektua bultzatzen duten erakundeen artean partekatutako lantalde batek bultzatutako programen ekoizpenean gauzatzen da. Lehenengo ekintza bi pieza dokumental horien ekoizpena da, bi artista nabarmenen ibilbideetan oinarritutakoak: Esther Ferrer (Donostia, 1937) eta Mari Puri Herrero (Bilbo, 1942). Artista horiek ibilbide profesional luzea izan dute eta azken hamarkadetan praktika artistiko garaikideen garapenari egindako ekarpena erabakigarria izan da. Orain aurkezten diren lan dokumental horiek sareko lanaren aldeko apustua dira, eta, aldi berean, bi erakundeek euskal artisten lana ikuspegi kritiko eta historiko batetik ikusarazteko duten konpromisoa indartzen laguntzen dute.

Dokumentalak ikusteko

Dokumentalen aurkezpena dela eta, museoak elkarrizketa bat antolatu du Herrerorekin eta Ferrerrekin martxoaren 26an, osteguna, 18:00etan, museoko zuzendari Beatriz Herráezekin eta Artxiboko eta Dokumentazio Zentroko arduradun Elena Roserasekin batera, artisten lan-prozesuetara eta pieza dokumental horien ekoizpenera hurbiltzeko.

Bi dokumentalak museoko A01 aretoan izango dira ikusgai apirilaren 19ra arte.

EiTBk Euskal artista garaikideen ERRESONANTZIAK: Esther Ferrer eta Euskal artista garaikideen ERRESONANTZIAK: Mari Puri Herrero lanak estreinatuko ditu ostiral honetan, martxoak 27, ETB On plataforman.