Tabakalerak eta Arte Ederren Bilboko Museoak "That Time" erakusketa bateratua aurkeztu dute. Bi erakundeek beren lehen lankidetza estreinatu dute, Bilboko museoan une honetan egiten ari diren handitze-lanen ondorioz sortutakoa. Artelanek Bilbotik Donostiara bidaiatu dute, ohiko bidearen alderantzizko noranzkoa hartuta, hau da, museo bateko bildumatik sorkuntza garaikideko zentro bateraino; eta bihartik datorren azaroaren 5era arte egongo dira ikusgai Tabakaleran. Erakustetako komisariotza bi erakundeetako barne-taldeek osatzen dute: Miriam Alzuri, Arte Ederren Bilboko Museoko Arte Moderno eta Garaikidearen kontserbatzailea; eta Oier Etxeberria, Tabakalera Kultura Garaikidearen Nazioarteko Zentroko Programa Publikoaren arduraduna.

Iragana eta oraina izan dira Arte Ederren Bilboko Museoaren bildumagintza-lanaren funtsezko bi ardatzak. Museoa 1908an sortu zen, eta K.o. II. mendearen eta gaur egun artean sortutako adierazpen artistikoen adibide esanguratsuak daude bertan. Bestalde, Tabakalera, bere egitekoen artean sorkuntza garaikidea, artea eta gure garaiko eztabaidak bultzatzea helburu duen zentroa, museoko bildumari buruzko ikuspegi berri bat eskaintzeko leku aproposa da. Beraz "That Time" orainean finkatutako begirada batez hurbiltzen da bildumara, baina begirada hori iraganera eta etorkizunera ere mugitzen da.

Museoko bilduma da erakusketaren jatorria, eta orain Tabakaleran dago erakusgai artearen eta memoriaren inguruko kontakizun bat proposatzeko. Erakusketaren izena Samuel Becketten That Time (1976) antzezlanetik dator. Lan horretan, poeta eta antzerkigile irlandarrak hiru ahots sortzen eta nahasten ditu, protagonistaren bizitzako hiru momenturen berri emateko: gaztaroko ahotsa, helduaroko ahotsa eta zahartzaroko ahotsa. Era berean, Tabakalerako erakusketa-espazioetan barrena egindako ibilbide zirkular batean antolatua dago erakusketa, honako hauek birsortzen dituzten hiru ahots horietan islatutako hiru eremutan: iragana (C ahotsa, zahartzarokoa), oraina (A ahotsa, helduarokoa) eta etorkizuna (B ahotsa, gaztarokoa). Horien bidez, bisitariak bilduma baten denboraren eta historiaren hiru aro ezagutuko ditu.

Jarduera-programa

"That Time"k uztailetik azarora bitartean egingo diren jarduera paraleloen programa garrantzitsu bat izango du. Uztailetik urrira bitartean, ohiko bisita solasaldiak eta familientzako arte-lantegiak eskainiko dira. Irailean Arte-makina arte garaikidera hurbiltzeko ikastaroa hasiko da. Oraingoan, erakusketaren komisario eta Arte Moderno eta Garaikidearen kontserbatzaile Miriam Alzurik, Susana Talayero eta Leire Aranberri artistek, Artearen Historian doktore Ane Lekuonak eta Jorge Oteiza Fundazio Museoko zuzendariorde Juan Pablo Huércanosek hartuko dute parte.

Abuztuan, Donostiako Musika Hamabostaldiarekin lankidetzan, Blanca Arrieta koreografoaren dantza-emanaldi hirukoitza izango da erakusketa-aretoan (emanaldi hori erakusketa honetarako ad hoc sortua da, artistak Tabakaleran egindako egonaldi batean).

Urrian, zinema ziklo batekin eta hitzaldi eta mahai-inguruz osatutako topaketa batekin osatuko da programa. Bertan, Euskal Herriko Unibertsitateko Filosofia Sailean Zientziarako Euskal Fundazioko (Ikerbasque) ikerketa-irakasle den Michael Marder-ek, Estetika eta Artearen Teoriako irakasle Andrea Soto Calderónek eta erakusketako komisarioek parte hartuko dute.

Katalogoa

"That Time" erakusketak katalogo bat du, erakusketako bi komisarioen testu kuratorialak biltzen dituena, Jimena Canales Harvardeko Unibertsitateko Zientzien Historiako doktorearen El arte como brújula y reloj saiakerarekin batera. Katalogoan, gainera, Becketten 1976ko jatorrizko testua dago, 1987ko gaztelaniazko itzulpenarekin eta, orain, lehen aldiz, euskarazkoarekin batera. Argitalpenak 20 euroren truke eskuratu ahal izango da Tabakalerako Info Puntuan.

• That Time. Arte Ederren Bilboko Museoa-Tabakalera.
• Ekainaren 23tik azaroaren 5era.
• Tabakalerako erakusketa-areto nagusia.
• Ordutegia: Asteartetik igandera: 12:00-14:00 eta 14:00-20:00.
• Astelehenetan itxita.