"Harrigarria egiten zait aitonaren obra horren ezezaguna izatea". Hala aitortu du Begoña Alcala Galianok, Alvaro Alcala Galiano margolariaren ilobak. Artista bilbotarraren biografia eta obra ezagutarazteko asmoz, Alvaro Alcala Galiano Vildosola. 1873-1936 liburua argitaratu du ilobak. Aurten bete dira 150 urte margolaria jaio zela.

Artistaren 341 obra bildu ditu denera: "Uste dut aitonaren ibilbide artistikoa bere osotasunean biltzen duela". Alcala Galianok Bilbon hasi zituen ikasketak. Handik, Madrilera joan zen 1890. urtean, eta 1900ean Holandara bidaiatu zuen. "Bidaia hark eragin nabarmena izan zuen aitonaren ibilbidean", azpimarratu du ilobak. Bereziki, itsasoarekin lotura zuten gaiak margotzen zituen sasoi hartan. Tartean, portuak, arrantzaleak eta itsasontziak. "Sei urtez ibili zen Bilbo eta Holanda artean joan-etorriak egiten". Garai hartakoa da Eguraldi txarra. Holanda margolana. Artistak Bilboko Arte Ederren Museoari eman zion dohaintzan, 1916. urtean, eta, orain, Itsasmuseumen dago ikusgai.

Margolaria 1936. urtean hil zen, Madrilen. "Oso gazte hil zenez, ezin izan zuen bere obra osorik garatu", esan du ilobak. Hala ere, pozik dago haren ibilbide osoa liburu bakarrean katalogatu duelako: "Lan handia izan da, baina aitonaren obrara hurbiltzeko modu bat izan da".