Hirien paisaia antropizatuaren adierazpenean zentratzen da Jon Gorosperen lana. Eraikuntza-dentsitate handiko hiriguneak dira, hain zuzen, gizakiak lurraldean utzitako arrastoaren goreneko adierazpena.

Argazkiak, bideoak eta argi-instalazioak erabiltzen ditu Gorospek interesatzen zaizkion gaur egungo arazoei buruz gogoeta egiteko tresna garaikide gisa, hala nola: hirien diseinua eta nola eragiten dion horrek bizitzaren garapenari, publizitatearen ugaltzea hirian, eremu publikoaren merkantilizazioa, gure hirien homogeneizazioa globalizazioaren ondorioz, arkitekturaren etsaitasuna gizartearen parte batekiko. Bestalde, haren bazterketa-izaera azpimarratzen du, eta baita paisaiaren identitatea ere, "egiletzarik gabeko" irudien bitartez.

Bere proiektuetan errepikatu egiten ditu ereduak, hala nola, lauki-sareak, konposizio modularrak eta metalezko angeluak edo gainazalak. Leunduaren, leunaren, akasgabearen kontzeptua —Byung-Chul Han hegokorear filosofoaren definizioaren arabera, gure garaiko identitatearen ikur gisa kokatzea, ederraren sinbolo— aluminioaren gaineko sublimazioetan, dibond lakatuaren gaineko argazki-arrastoetan edo xafla metalikoen gaineko proiekzioetan islatzen da.

Hainbat begirada mota ageri dira Gorosperen obran: hiriko espazioetan zaintza-kameren nonahikotasuna imitatzen duten irudiak, pertsona anonimoek eta enpresa espezializatuek hartutako Interneteko irudiak, eta hiriko ikonografiaren zatien irudiak, turisten eta oinezkoen ezaugarri arkitektonikoak eta keinu klonatuak identifikatzeko.

Jon Gorosperen jardun artistikoak zubiak eraiki nahi ditu behaketa dokumental zorrotzaren eta espazioaren irakurketa kontzeptual eta poetikoaren artean: "Nire ustez —dio Gorospek—, hiri-eremua aukerez beteriko leku bat da, eta baita balio dokumentaleko eta estetikoko irudiak sortzeko eremu perfektua ere".

Erakusketa-proiektu honetan Alejandro Castellotek jardun du komisario-lanetan. Zazpi argazki sailez osatu da erakusketa, eta horietan guztietan lantzen dira Gorosperen lanaren motibazioak eta kezkak: Noraezean, Polished Cities [Hiri leunduak], The Spot [Iragarkia], Peripatetic Studies: The Hostile [Ikasketa peripatetikoak: aurkakoa], Peripatetic Studies: Bivouac [Ikasketa peripatetikoak: vivaca], The Grid [Lauki-sarea], Skyline [Hiri-ingurunea].

Jon Gorospe

Jon Gorospe (Gasteiz, 1986). IDarte (Euskadiko Arte eta Goi Mailako Diseinu Eskola Publikoa) eskolan eta Vilniuseko (Lituania) Arteen Fakultatean egin zuen gradua. Prestakuntza osatzeko, argazkilaritza, egile zinema eta arte bisuala ikasi zituen. Jardun artistikoaz gainera, komisario gisa lan egin du, eta Gasteizko Viphoto jaialdiaren zuzendaria izan da (2018-2020). Erakunde publiko zein pribatu ugarik aitortu dute haren lana, hala nola Salomon R. Guggenheim museoak (Estatu Batuak) edo Sasakawa fundazioak (Japonia-eskandinavia). Hainbat herrialdetan egin ditu erakusketak, besteak beste, Espainia, Portugal, Italia, Frantzia, Alemania, Ingalaterra, Eslovakia, Norvegia, Errusia eta Singaporen. www.jongorospe.com

Komisarioa

Alejandro Castellote (Madril, 1959). Komisario independentea, saiakeragilea eta argazkigintzako irakaslea. Funtsezko zeregina bete du argazkilaritza garaikidearen sustapenean, bai Espainian bai Latinoamerikan. Madrilgo Arte Ederren Zirkuluko Argazkigintzako Sailaren arduradun izan zen 1985 eta 1996 urteen bitartean, eta han zela, FOCO jaialdia bultzatu zuen; PhotoEspaña jaialdiaren lehen zuzendari artistikoa izan zen 1998tik 2000ra bitarteko edizioetan, eta nazioartean garrantzizkoa den ekimen horren oinarriak finkatu zituen. Nazioarteko Biurtekoak eta Jaialdiak zuzendu ditu, eta hainbatetan kolaboratzaile gisa jardun du, besteak beste: Veneziako Arkitekturaren Biurtekoa C on Cities proiektuarekin, 2006an; Daegu Photo Biennale Hego Korean eta Singapore International Photography Festival, 2014an eta 2012an, hurrenez hurren; Getxophoto (2007-2009) eta Photoquai Biurtekoa Parisko Musée du Quai Branlyn.

Argitalpena

Erakusketaren harira lan bat argitaratu da. Bertan dokumentatzen dira erakusketa osatzen duten lanak, eta, horrekin batera, Alejandro Castellote erakusketaren komisarioaren saiakera bat eta Jon Gorosperen testu bat irakurri ahalko dira. Hiru hizkuntzatan argitaratuko da, euskara, gaztelania eta ingelesa, eta underbauk diseinatu du.