Tabakalerak berrikuntzaren eta sormenaren aldeko apustua egiten jarraitzen du, eta publikoa, oraingo honetan, errealitate areagotuaren bidez mugarik gabeko bidaian murgiltzera gonbidatzen du. Tabakalerak, bere publizitate-kanpaina berriaren bidez, irudimena duten tokietara bidaiatzen jarraitzea proposatzen die bertako herritarrei eta baita bisitariei ere, ar.t.eus esperientzia berritzailearekin.

Tabakalera sorkuntzarako, erakusketarako, topaketarako eta aisialdiaz gozatzeko gunea da, eta askotariko planak eskaintzen ditu: arte garaikidea, zinema, hiritar-sorkuntza, zientzia, teknologia eta kultura digitala, besteak beste. Tabakalera ez da soilik leku fisiko bat, adimenaren "bidaia amaigabeetarako" abiapuntua ere bada. Bere benetako esentzia irudimenaren bidez mundu mugagabeak irekitzeko gaitasunean datza.

Tabakaleraren ikuspegi hori iazko "Bidaia amaigabea" publizitate-kanpainan eta orain abian jarri berri denean egikaritzen da. Aurten, apustua ar.t.eus esperientzia berritzailearekin indartuko da, mundu erreala errealitate areagotuarekin konbinatzen duelarik. Lau esperientzia interaktiboren bidez, erabiltzaileek irudimena hegan egiten utz dezakete eta Tabakaleran dauden mundu infinituak esploratu. Kanpaina grafikoa Donostian barrena dago, ilustrazio koloretsuekin, eta markesinetan, karteletan eta ar.t.eus orrian dauden QR kodeak eskaneatzera gonbidatzen ditu guztiak, esperientzia hori software gehigarri bat deskargatu beharrik gabe eskuratzeko. Errealitate areagoturako sarbidea demokratizatzea izan da kanpainaren erronka tekniko nabarmenetako bat, azken belaunaldiko smartphone bat duen edonori AR.T.eus delakoaz zailtasunik gabe gozatzeko aukera ematen diona.

Bigarren aldiz, MUY agentzia arduratu da Tabakaleraren publizitate-kanpaina egiteaz, The Lion bere garapen digitalaz eta Happyending Studio eta FFraca Design Office ilustrazioez. Errealitate areagotuko irudiak Happyending Studiorenak, Ivan Miguelenak, Pierpaolo Lampitellirenak eta Maialen Arozenarenak dira.

Saritutako kanpaina

2023ko kanpaina goraipatua izan da eta, duela aste gutxi, zilarrezko bi Laus sari jaso ditu Diseinu Grafiko eta Komunikazio Bisualaren ADG Laus jaialdi entzutetsuan, Arte - Ilustrazio eta Web Zuzendaritza kategorietan. Sari hauek joan den apirilean Sormen Klubak Donostian antolatutako Sormen Sari Nazionaletan jasotako bi sariei gehitu behar zaizkie; izan ere, Tabakalerako kanpaina izena eman zuten 1.407 proiektuen artean nabarmendu zen, eta Zilarrezko Sari bat jaso zuen Ilustrazioan eta Urtekari sari bat Eduki Digital Interaktiboren atalean. Horrela, iazko kanpainak Tabakalera marka handien parean jartzea lortu du, Espainiar estatuko sailkapeneko 27. postuan kokatuz.