Bere lan probokatzaileengatik ezaguna den Maurizio Cattelanek, zarata sortu du berriz ere Comedian obrarekin, zinta itsaskorrarekin pareta bati itsatsitako platanoarekin. 2019an Art Basel Miami Beachen lehen aldikoz aurkeztua, obra — 3 aletan eta 120.000 dolarretan saldua une hartan — gailurrera iritsi da 2024ko azaroaren 20an Sotheby's-ek New Yorken antolatutako enkantean: 6,2 milioi dolarren truke esleitua izan da (5,7 milioi euro inguru), gastuak barne, hasierako estimaziotik (1 eta 1,5 milioi dolar artean) askoz harago joanda.

Manhattango janari-denda batean goizean 35 zentimoko prezioan erositako fruta arrunt hori benetakotasun-ziurtagiriarekin eta banana usteltzen denean ordezkatzeko argibideekin batera dator. Justin Sun enpresari txinatarrak irabazi du enkantea, beste sei lehiakideren aurrean. Platanoa kontsumitzeko asmoa adierazi du, keinu horren bidez artearen eta herri kulturaren historian izan duen rola azpimarratuko duela esanez.

Maurizio Cattelanek Comedian artearen merkatuko espekulazioaren kritika zorrotza gisa sortu zuen. "Objektu batek zer oinarritan hartzen du balioa?" bere buruari galdetzen dio, azpimarratuz artistek normalean ez dutela deus jasotzen beren sorkuntzen birsalmentetatik. 2019an, Miamin, obrak sorkuntza mota horren zilegitasunaren inguruko eztabaida bizia piztu zuen. David Datuna artistak lehen platano hura jan zuen azokan bertan, performance probokatzaile batean, eta minutu batzuk geroago banana ordezkatu zuten.

Erosketa horren epe luzerako bideragarritasunaz zalantza izaterik badago, lizitazio horrek erosleari bere nabarmentasun momentua izateko aukera ematen dio, eta Sotheby's-i prentsa zabala. Salmenta errekor honekin, Comedianek funtsezko galdera planteatzen jarraitzen du: zerk ematen dio balioa arteari?