San Telmo Museoak Gabriela Cendoya Bergarecheren (GCBC) argazki-liburu bilduma erosi du, 2017tik bere liburutegian kontsulta daitekeena bi aldeek sinatutako komodatuari esker. Funts berriak STM-GCBC argazki-liburu bilduma izena hartuko du eta une honetan 3425 liburuk osatzen dute; horietatik 3143 Gabriela Cendoyaren bildumakoak dira eta 282 komodatua hasi zenetik museoak erositako aleak dira.

GCBC bilduma garaikidea, nazioartekoa eta oso eklektikoa da, eta arreta berezia eskaintzen die autoedizioei, tirada txiki eta ia bakarreko argazki-liburuei eta emakumeek egindako argazkigintzari. Gainera, pisu berezia dute argazkilari japoniar eta latinoamerikarren lanek. Estatuko eta Europako argazki-liburu bilduma garrantzitsuenetako bat da, eta gaur egun aurkitu ezin diren aleak ditu.

San Telmo Museoarentzat oso interesgarria da hainbat arrazoirengatik. Horien artean azpimarra daiteke, alde batetik, Arte Ederrekin, argazkigintzarekin eta sorkuntza garaikidearekin duen harreman zuzena; eta, bestetik, lantzen dituen gaien aniztasuna, horietako asko gaurkotasun handikoak (migrazioak, gerrak, feminismoa, abortua, zahartzaroa, transexualitatea, klima-aldaketa, adimen artifiziala...) eta museoaren Erronkak programarekin zuzenean lotura dutenak.

Bilduma 2017an museoan sartzeak ekarri duen esperientzia baikorraren ondoren eskuratu da. Urte hauetan zehar funtsa handituz joan da, gaur egungo 3143 aleetara iritsi arte. Gabriela Cendoyak eta museoak elkarrekin egindako lanaren ondorioz sendotu egin dira jarduera programazioa, museora datorren publiko espezifiko bat eta horrelako bilduma batek espazio publiko batean duen eskaintzaren garrantzia.

Bi aldeek baloratu dituzte faktore horiek guztiak museorako bilduma hori 300.000 euroan erosteko. Egunez egun handituz doa balioa.

Aurrerantzean museoak gorde eta zabalduko duen STM-GCBC argazki-liburu bilduma estatuko aberatsenetakoa da, egun dituen 3425 aleekin. Horrek San Telmo parekatzen du argazki-liburu bildumak ere badituzten lehen mailako beste museo eta arte zentro batzuekin, hala nola MNCARS, Fundación Fotocolectania, MACBA, Fundación Photographic Social Vision...

San Telmoko liburutegia, museoan eta bertan lantzen diren gaietan espezializatua, argazki-liburu bilduma bat duen autonomia erkidegoko toki publiko bakarra da, eta horrek garaikidetasun eta espezifikotasun handiagoa ematen dio. Azken 7-8 urteetan, museoa eta bere liburutegia argazki-liburuari eta argazkigintzari buruzko erreferentziagune bihurtu dira bai Gipuzkoan eta Euskadin, bai Estatuan; eta etorkizunean ere horri eutsi nahi zaio.

Argazki-liburua izan da museora sartzeko atea pertsona askorentzat, batez ere, gazte eta heldu gazteentzat, eta gero eta gehiago dira liburutegira funtsa kontsultatzera hurbiltzen direnak. Argazkigintza ikasleentzat baliabide garrantzitsu gisa hartzen duten ikastetxeekin harremana ere sendotu egin da; hala, hainbat aldiz hitzartu dituzte bisita bereziak liburutegira zentro hauek: Mondragon Unibertsitatea-HUHEZI Fakultatea, Bartzelonako L 'Observatori, Bilboko Kunsthal Diseinu Eskola, Usandizaga Batxilergo Institutua, Bilboko Black Kamera eta Bilboko Argazkigintza Garaikideko Zentroa (duela gutxi itxi dute). Era berean, argazkigintzaren alde lan egiten duten beste erakunde edo entitate batzuekin harremanetan jartzeko aukera eman dio museoari, hala nola, Le Bal de Paris, Plataforma por el Centro Nacional de Fotografía, Art Libris Barcelona, BAFFEST edo Getxophoto.

Hori guztia dela eta, erosketa hau oso urrats garrantzitsua da San Telmok argazki-liburuaren inguruan duen jardueran eta funtzioan.

Aurrerantzean, orain arte bezala, museoak bilduma liburutegian publikoaren eskura jartzen jarraituko du, argazki-liburuaren unibertsoa zabaltzeko aurkezpenak eta tailerrak antolatuko ditu, eta bildumako piezak museoko erakusketetan sartzen jarraituko du, argazkilari artisten ikuspegia osatzeko eta horietako bakoitzean lantzen diren gaiei gehitzeko.

Era berean, museoak bere argazki-liburu bilduma handitzen jarraituko du, aurrekontuetan diru kopuru bat eskainiz.