Eraso intentsiboek, neurri batean, ondarea saihestu omen dute, baina hainbat lekuk —tartean UNESCOren Gizateriaren Ondarean inskribatutako batzuek— kalte partzialak jasan dituzte. Herrialdeak 29 elementu ditu zerrendan, horien artean Historiaurreko garaiko aztarnategiak (Khorramabad haraneko harpeak, esaterako).

Irango Ondare Kulturaleko ministroak martxoaren erdialdean adierazi zuenez, Teheranen 19 monumentu eta gune kaltetu dira, eta 50 baino gehiago herrialde osoan. Golestan jauregiaren kasua da, 2013tik Gizateriaren Ondare dena: XIX. mendean berreraiki zuten antzinako gotorleku baten gainean, eta Qajar dinastiaren boterearen egoitza izan zen, artearekiko zaletasunagatik ezaguna. Sare sozialetan zabaldu diren bideoek zorua beira puskaz eta Qajar estiloko ispilu-mosaikoz estalita erakusten dute, monumentua ospetsu egin duen ezaugarrietako bat. Badirudi aireko bonbardaketen leherketa-uhinek jo dutela eraikina. Lekukotasunen arabera, bonbardaketek Teherango merkatu estalia ere jo dute.

Isfahanen, Gizateriaren Ondareko hainbat monumentuk kalteak jasan dituzte, besteak beste Isfahango Meskita Handiak (VIII-XII. mendeak), bere zeramika-dekorazioengatik eta kupula urdinagatik ezaguna. Hiriguneko Chehel Sotoun konplexua ere partzialki kaltetua izan omen da. XVII. mendeko persiar lorategi eta eraikin multzo honek ispilu-mosaikoz apaindutako jauregiak ditu, eta arteetan zein literaturan sarri irudikatua izan da. Agintarien arabera, azken bonbardaketek Naghsh-e Jahan plaza (XVII. mendea), bere ur-putzu eta jauregiengatik ezaguna, jo dute.

UNESCOk gogorarazi du gerraren hasieratik bertatik Gizateriaren Ondareko guneen koordenatu geografikoak eman dizkiela inplikatutako aldeei, eta gaur egun kalteen neurria ebaluatzen ari dela. Martxo hasierako agiri batean, 1954ko Hagako Hitzarmena errespetatzeko deia egin du. Bestalde, Iranek 120 gune eta monumentu baino gehiago markatu ditu Blue Shield (Babes Urdina) ikurrarekin, gatazkan dauden armadei seinalatzeko, hitzarmenak gomendatzen duen bezala; Iran, AEBak eta Israel akordio horren parte dira.

—JdA-tik ekarria