Nafarroako Gobernuak 620.000 dolar ordainduko ditu Pompeloko Togadunarengatik —575.000 euro inguru—. Iberiar penintsulan brontzezko bi estatua togadun bakarrik aurkitu dira, eta Pompelokoa da horietako bat. Iruñean aurkitu zuten, 1895ean. Estatuaren kokalekua ezezaguna izan zen 2015 bitarte, Ipar Amerikako bilduma partikular batean aurkitu zuten arte, zehazki. Iaz, Nafarroako Gobernuak jabearekin bi urterako gordetze akordio bat sinatu zuten. Ekainaren 17an jarri zuten ikusgai Nafarroako Museoan, eta geroztik joan den hilabetera bitarte 50.000 lagunek ikusi zuten.

Gaur egin dute prentsaurrekoa albistea jakinarazteko, eta bertan izan dira Rebeca Esnaola Kultura eta Kirol kontseilaria, Ignacio Apeztegia Vianako Printzea Erakundeko Kultura zuzendari nagusia, eta Susana Irigarai Museoen Zerbitzuko zuzendaria. Esnaolak azaldu du Togaduna erosteak "aukera emanen diela herritar guztiei hartaz gozatzeko, eta espezialistei haren ezaugarriak aztertzeko". Eta horrek lagunduko diela "iragana hobeto ulertzen eta ezagutzen". Jabearen "eskuzabaltasuna eta prestasuna" eskertu ditu, "bi urtez pieza kontraprestaziorik jaso gabe museoan uztea onartu" baitzuen.

Apeztegiak ere eskerrak eman ditu: "Gure historiako hain pieza baliotsua erostea posible izan da pertsona eta erakunde askoren orainaldiko eta iraganeko esku hartzeari esker. Izan ere, oso zaila da horrelako pieza baterako merkatu prezioa zehaztea, ia bakarra baita bere generoan". Zehazki, eskultura eskuratzeko prozesu guztiaz arduratu da Kultura eta Kirol Ministerioaren Espainiako Ondare Historikoko Ondasunen Kalifikazio, Balorazio eta Esportazio Batzordea.

Bi estatua bakarrik

Bi dira Iberiar penintsulan aurkitutako brontzezko togadunak: Periatekoa eta Pompelokoa. Lehenbizikoa Granadako Arkeologia eta Etnologia Museoan dago, eta bigarrena, Nafarroako Museoan. Pompeloko Togadunaren berezitasunak aztertzeke daude oraindik. Hala ere, horiek argitzeko Nafarroako Ondare Historikoaren Zerbitzua eta Euskal Herriko Unibertsitatea elkarrekin ari dira lanean. Zehazki, estatuaren alderdi hauek ezagutu nahi dituzte: fabrikazio teknika, kontserbazio egoera, materialaren jatorria, egindako zaharberritzeak, eta polikromia hondarren presentzia. Horrez gain, Museoen Zerbitzuak estatuaren 3D argazkia atera du, haren azterketak eta zabalkundea errazagoak izan daitezen.