Abenduaren 15ean eta 16an, Tabakalerak ateak irekiko ditu bere jardueraren alderdi ezezagunena erakusteko: sorkuntzari ematen dion babesa. Bi egunetan zehar, interesa duen edonork kultura garaikidearen zentroko txokoak arakatu, Artisten Gunea ezagutu eta diseinatutako jarduera ugaritan murgildu ahal izango du.

Erakusketak, sormen tailerrak, tokiko eta nazioarteko artistekin solasaldiak, zuzeneko ikuskizunak eta askoz gehiago. Ate irekiko asteburu honetan Tabakalera definitzen duen arte eta kultura munduaren panorama osoa eskainiko da.

Asteburuko egitaraua

Abenduaren 15ean eta 16an, Tabakalerako 3. solairua artea maite dutenak, moda jasangarriaren sortzaileak eta zaleak erakarriko dituen ekitaldien epizentroa izango da.

Lehenengo jardunaldia Artisten Gunean hasiko da, Tabakalerako egoiliarrak urte osoan zehar hartzen dituen gunea. Bi egunez zabalik egongo da jendearentzat, Marc Vives, Marta van Tartwijk, Inés Cámara Leret, Susana San José, Sequoia Barnes eta Ane Zelaia, estudioetara bisitak egin ahal izateko.

Abenduaren 16an, Tabakalerako ikus-entzunezkoen laborategiak sustatutako Noka eta Ikusmira Berriak ikus-entzunezko programen bi parte-hartzailek eta EQZEko ikasle ohiek, Marina Palaciok eta Maria Inês Gonçalvesek, beren lanen muntatzaile Gerard Borrásekin batera, euren sormen prozesuetako materiala erakutsiko dute eta harreman zuzena izango dute bertaratzen diren guztiekin.

Hirugarren solairuko beste gune batean, Eginzaleak herritarren sorkuntzarako topaketa egingo da. Bertan, Medialaben urtean zehar egindako lana ezagutu ahal izango da, bai eta jasangarritasunaren eta berrerabileraren inguruan jarduten diren sortzaile gonbidatu gehiagorena ere, arteari eta ehungintzari arreta berezia eskainiz. Egunean zehar, jendearentzako jarduera-programa bat eskainiko da, jantzien eta ehunen konponketa, berrerabilera, estanpazioa, estilismoak eta osagarriak sortzea eta kustomizazioa ardatz hartuta. Artista gonbidatuak hauek izango dira: Sandra Linio, Clara Virgili, Jaione Anzola - Anti Anzola, Aritz de la Hera, Puntada Bastarda, Ane Baztarrika, Valeria Irisarri, Urtzi Urkixo (Voltaire Lab), Kika Merino, Julene Gregorio eta Markel Gonzalez.

Era berean, 16:00etan, Ane Arana sortzaileak tailerra eskainiko du, kirol kamisetekin kortseak egiteko. Kamiseta horiek berrerabiliz, sormena eta iraunkortasuna sustatu nahi dira jantzien diseinuan, teknika sinpleak eta oinarrizko materialak erabiliz. Arratsaldean, Alex Hug izango da "Topak denontzat" tailerraren buru. Bertan, jantziak ekoiztean botatzen diren oihalezko txatalak berrerabiliko dira. Zati horiek modako makineriarako txikiegiak dira, eta zabortegietara ez joateko bigarren aukera bat eskaintzen diegu. Bi tailerretan parte hartzeko, Tabakaleraren webgunean izena eman beharko da.

Jardunaldia itxi aurretik, Betile Crocanti Medialabeko taldeak, modu kolektiboan joskintzaren bidez lan egiten duenak eta hondakinarekiko zein gainerakoekiko alternatibak bilatzen dituenak, ikus-entzunezko esperientzia paregabea eskainiko du.

Musika lagun izango dugu bi egunetan. Dj Gela arduratuko da Artisten Gunea girotzeaz, eta larunbatean, hilak 16, Silitia eta DJ MaKedaren kontzertuekin itxiko da ekitaldia Tabakalerako Prisman.

Ate irekiko asteburu honek bertaratzen diren guztientzat esperientzia aberasgarria izango da, sorkuntzaren mundu liluragarrian murgilduz Tabakaleraren bihotzean.