Donostiako Tabakalerak urtarrilaren 11n ekingo dio datorren urteko zinema programazioari. Beste behin, elkarlanean ondu dute urteko eskaintzaTabakalerak, Donostiako Zinemaldiak, Euskadiko Filmategiak, Donostia Kulturak eta Elias Kerejeta Zine Eskolak, eta publiko berria erakartzea izango da xede nagusienetako bat. Helburu hori lortze aldera, hilean behin EHUko ikasle talde batek programatuko du Tabakalerako zinema aretoa. Film emanaldietatik harago,zinemari lotutako solasaldiak, argitalpenak eta bestelako ekitaldiak ere prestatu dituzte.

Western garaikidea Nosferatu zikloan

Ameriketako Estatu Batuetako western garaikidea izango da protagonista Nosferatu zikloan. 1962tik 2021era arteko filmak emango dituzte Tabakaleran. Besteak beste,Dances with Wolves(Kevin Costner, 1990),Unforgiven (Clint Eastwood, 1992), First Cow (Kelly Reichardt, 2019) eta The Power of the Dog (Jane Campion, 2021). Urtarrilaren 17an hasiko dira saioak, Sam Peckinpah zinema zuzendariarenRide the High Country(1962) pelikularen emanaldiarekin.

Zikloa osatzeko, bi liburu ere plazaratuko dituzte. Urtarrilean argitaratuko dute lehena, gaztelaniaz:Carlos Aguilarrek eta Pablo Fernandezek koordinatu dute. Euskaraz idatzitakoa, berriz, datorren urtearen amaieran kaleratuko dute; Iñigo Marzabalek koordinatuko du.

Zinema eta zientzia zazpigarrenez

Zinema eta zientzia zikloari urtarrilaren 11n ekingo diote,Oppenheimer filma proiektatuz (Christopher Nolan, 2023). Emanaldiaren ondotik, Pedro Miguel Etxenike fisikari eta DIPCDonostia International Physics Centerreko presidenteak hitzaldia egingo du.Zazpigarren aldiz antolatu du zikloa Euskadiko Filmategiak, DIPCenzein Donostiako Zinemaldiaren laguntzaz, eta laster jakinaraziko dituzte zikloko gainerako hamar filmen izenak. Ohi bezala, klasikoak eta lan berriagoak bilduko ditu.

Sormen diziplinen nahasketa

Askotariko sormen diziplinen arteko gurutzaketa bultzatu izan du Tabakalerak hasiera-hasieratik, eta, aurten ere, hala egingo dute: zinema eta literatura uztartuko dituzte. Bi zinemagile hautatu dituzte horretarako:Marguerite Duras eta Bas Devos.

Duras idazle eta zinemagilearen obran sakonduko dute lehenik: hilean behin, harekin lotutako zinema saio bat egingo dute. Horietako bakoitzaren aurkezpenean, gainera, idazle batek parte hartuko du. Miren Agur Meabe izango da lehen gonbidatua: Le Camion filmaren inguruan arituko da, urtarrilaren 12an.

Urtarrilaren 13tik otsailaren 24ra, berriz, Devos zine zuzendari eta gidoilariaren lan guztiak erakutsiko dituzte:Violet,Hellhole,Ghost TropicetaHere.

Horiez gainera, beste hainbat programak osatuko dute Tabakaleraren urteko zinema eskaintza. Horien artean daude, besteak beste, Kontatutako zinea, Kamaleoiak gara! eta Zinema garaikidea programak. Bestalde, aurreko urteetan egin legez, Donostiako Zinemaldiak urte osoko jarraipena izango du.

Zikloetarako bonuak eta sarrera arruntak etzi jarriko dira salgai, Tabakaleraren webgunean.