Nestor Basterretxearen eta Eduardo Txillidaren jaiotzen mendeurrenean, Donostiako 85. Musika Hamabostaldiak haien omenezko hiru emanaldi eskainiko ditu. Bi artisten leku "kutunetan" izango dira kontzertuak, Gipuzkoan: Txillida Leku museoan, Hondarribiko Itsas Etxean eta Arantzazuko santutegian. Bihar izango da lehen emanaldia, eta hilaren 21ean eta 29an hurrengo biak.

Lotura estua izan zuten bi artistek jaialdiarekin. Basterretxeak, esaterako, Musika Hamabostaldiko 64. aldiko kartela sortu zuen, 2003an. 1979an, gainera, ezohiko aldi batean —abenduan egin zuten abuztuan egin beharrean—, Oldarra Miarritzeko ballet konpainiaren Gernika emanaldiko dekoratuak egin zituen. Hurrengo urtean, 1980ko Hamabostaldian, Anoetako belodromoan ospatu ziren Zaldiko eta Txorittua galak zuzendu zituen Iñaki Beobiderekin batera.

Txillidak, berriz, jaialdiko 57. aldiko kartela egin zuen, 1996an. Bost urte geroago, 2001ean, Txillida Leku museoak ateak ireki zizkion aurrenekoz Hamabostaldiari. Harrezkero, bertan ere antolatzen dituzte Musika Hamabostaldiko zenbait kontzertu. Bi artisten semeek, Luis Txillidak eta Mikel Basterretxeak, adierazi dute "ohore handia" dela haien aitak omenaldi hauen bitartez gogoratzea.

DAB dantza konpainiak Txillida omenduko dubihar, Noeud ikuskizunean, Txillida Leku museoan. Espazioekin eta figura lerromakurrekin jolastuko dira, artistak Cristobal Balentziagaren omenez egin zuen eskultura oinarri hartuta. DAB dantza konpainiako Marina Eskisabelek azaldu duenez, German Ormazabalen eta Alai Ormazabalen musikaren doinupean "lotutasunetik askatasunera egindako bidaia bat" azalduko dute dantzaren bitartez. Balentziaga museoan ere izango dira: etzi, 20:30ean.

Abuztuaren 21ean, Nestor Basterretxearen omenezko ekitaldia egingo dute Hondarribiko Itsas Etxea auditoriumean. Nestor Basterretxea, erroen modernitatea dokumentala proiektatuko dute lehendabizi, eta, proiekzioaren ondoren, dokumentalean parte hartu zuen Pello Ramirez biolontxelo jotzailea eta Nacho Soto pianistak kontzertua eskainiko dute.

Bi artistak batera omenduko dituzte abuztuaren 29an, Arantzazuko santutegian. Abraham Cupeiro musikari galiziarrak eta Ensemble Musica Practica taldeak Oiasso Kamerata, Oreka TX, Eñaut Elorrieta eta Agus Barandiaranekin batera eskainiko dute kontzertua. 19:00etan izango da.