The Guardian egunkari britainiarrak argitaratutako informazioaren arabera, Victoria & Albert Museumak (V&A) Britainiar Inperioko merkataritza-bideak irudikatzen zituen 1930eko hamarkadako mapa bat kendu du. Mapa hori "Music Is Black" erakusketako katalogoan argitaratzekoa zen, baina C&C Offset Printing inprimategi txinatarrak ohartarazi zuen Txinako Prentsa eta Argitalpen Administrazio Orokorrak (GAPP) irudia baztertzea agindu zuela.

Maparen gai nagusia ez zen Txina, baina Txinako lurraldea eta mugak agertzen ziren bertan. Hori nahikoa izan da Txinako zentsurak esku hartzeko, Pekinek balioztatutako mapak erabiltzea behartzen baitu. Beste katalogo batean ere, 2021eko "Fabergé: Romance to Revolution" erakusketakoan, museoak beste mapa bat eta Vladimir Leninen argazki bat kentzea onartu zuen. Egunkariak argitu duenez, V&A museoko barne-posta elektronikoek erakusten dute lan-taldeek etengabe aldatzen ari den murrizketa-zerrenda bati buruz hitz egiten dutela, Txinako "lerro gorrien" ezustekotasuna eta hedapen progresiboa azpimarratuz.

Inprimategiak museoari bidalitako mezuan zioen 10. orrialdeko mapak Txina ukitzen zuela eta "Txinako Gobernuaren mapa estandarrak erabili behar direla"; ondorioz, GAPPek baztertu egin zuela eta irudia kentzea edo beste batengatik ordezkatzea iradoki zuen. Londresko erakundeak, azkenean, mapa kendu eta Antilletatik Southamptonera iristen ari diren migranteen argazki bat jarri zuen haren ordez.

Museoak garrantzia kendu die moldaketa horiei, eta adierazi du aldaketek ez dutela katalogoen edukiaren zentzu zientifikoa aldatu. Erakundeak gehitu du arazotsutzat jotzen dituen eskaerei uko egiteko aukera mantentzen duela.

Victoria & Albert Museumak, Britainia Handiko beste erakunde handi batzuek bezala (British Museum, Tate, British Library), Txinan kokatutako inprimategiak erabiltzen ditu, batez ere kostuengatik; izan ere, katalogoak Erresuma Batuan edo Europan baino erdi merkeago ekoitzi daitezke bertan. Hautu horrek, ordea, inprimategi horiek GAPPen arau zorrotzen mende egotea dakar. Erakunde horrek arreta bereziz zaindu eta mugatzen ditu gai sentikorrak ukitzen dituzten mapak eta irudiak: Txinako mugak, Tibet, Taiwan, Tian'anmen edo Hong Kongeko mugimendu pro-demokratikoak.

Naoned-eko (Bretainia) "Genghis Khan" erakusketak ere agerian utzi zuen Txinako zentsura nola sartzen den Mendebaldeko museoen kontakizunetan. Historiako Museoa urteak zeramatzan erakusketa bat prestatzen, Hohhoteko (Barne Mongolia) museoarekin elkarlanean. 2020an, Txinako Ondarearen Bulego Nazionalak "Genghis Khan", "inperio" eta "mongoliar" bezalako hitzak kentzea exijitu zuen, eta edukien gaineko gainbegiratze osoa eskatu zuen, mongoliar historia Txinako batasun lurraldearen kontakizunaren barruan sartzen zuen sinopsi alternatibo bat proposatuz. Naoned-eko museoak bertan behera utzi zuen jatorrizko proiektua 2020ko udazkenean. Azkenik, 2023an aurkeztu zen erakusketa, baztertutako hitzak berreskuratuz eta bazkide berriekin osatuta, Mongoliako Genghis Khan museoa tarteko.

— JdA-tik ekarria