Guggenheim Bilbao Museoak atari berri bat jarri du abian, bere jarduerarekin, batez ere Bildumarekin eta programazio artistikoarekin lotutako ekoizpen propioko ikus-entzunezko edukiak ezagutzera emateko. Erakusketei buruzko hitzaldiek, dokumentalek, elkarrizketek, mahai-inguruek eta hainbat hezkuntza-programak osatuko dute plataformaren eskaintza.

Guggenheim Bilbao Kanalak Museoak 27 urteko ibilbidean sortutako eduki joria eta askotarikoa eskaintzen du, eta doan eskura daiteke. Irteerako une honetan 200 bideo baino gehiago ditu, hainbat kategoriatan banatuta: inaugurazio-hitzaldiak, ingurumen-jasangarritasuna, arte biziak (musika, dantza, performancea) eta sailak. Era berean, sailak lau ataletan banatzen dira: Museoko erakusketei buruzko dokumentalak;Guggenheim Bilbao Insights (Museoko arte-arduradunen eta Bildumako artisten arteko elkarrizketak); Ikuspuntuak (kulturako profesional ezagunen hausnarketak, besteak beste, zinema, musika, moda, dantza edo gastronomiakoak, Museoaren Bildumako lan enblematikoen inguruan, La Caixa Fundazioarekin lankidetzan garatuta) eta Ezagutu (museoaren lanarekin lotutako jarduera bereziei buruzko bideoak).

Bestetik, kanal berriak zuzeneko emanaldien atari bat izango du, ikusleei sarbidea eskainiko diena Museoak Entzungelan eta beste espazio batzuetan programatzen dituen jardueretara, tartean hitzaldietara, ekitaldietara edo erakusketetarako bisita gidatuetara.

Ikus-entzunezko plataforma honi esker, publiko orokorrak, eta Community osatzen duenak (Museoko artearen eta kulturaren inguruan 24.000 lagunek eta 240.000 jarraitzailek osatzen duten komunitateak), Museoak bildutako artera eta garatzen dituen jardueretara modu intuitibo eta errazean hurbiltzeko aukera izango dute, gailu mugikorretatik edo tabletetatik, Museoaren webgunearen bidez. Plataforma hau belaunaldi berriak erakartzeko helburuarekin ere sortu da, teknologia berrien eta webguneak eskaintzen dituen aukera hobetuen bitartez.

https://canal.guggenheim-bilbao.eus/eu