Artium, Euskal Herriko Arte Garaikidearen Museoan, "Ibon Aranberri. Entresaka | Vista parcial" argitalpenaren aurkezpena egingo da datorren apirilaren 9an, asteazkena, 18:30ean. Katalogoa Artium Museoak eta Reina Sofia Museoak batera argitaratu dute, eta bi erakundeetan 2023an eta 2024an egindako erakusketa-proiektua dokumentatzen du. Ruth Noack, Shep Steiner eta Miren Jaio historialariek parte hartu dute katalogoan testu banarekin. Argitalpena aurkezteko, Museoak Aranberri eta Jaioren arteko elkarrizketa antolatu du. Sarrera librea eta doakoa izanen da, edukiera mugatuarekin.

2024ko apirilean Artium MuseoakIbon Aranberri (Itziar-Deba, Gipuzkoa, 1969) artistaren lanari eskainitako Entresaka erakusketa zabaldu zuen. Lan honek honek laurogeita hamarreko hamarkadan hasi eta gaur egunera arte iritsi den obra sorta bat biltzen zuen. Erakusketa Reina Sofía Museoarekin elkarlanean egindako proiektuaren parte da. Bertan, artistaren ekoizpenari eskainitako lehen erakusketa bat egin zen Vista Parcial izenburuarekin, eta horri Entresaka izenarekin Artium Museoan egindako aurkezpen berria gehitu zitzaion. Aranberriren lan adierazgarriek osatzen zuten bi erakusketen muina, eta biek agerian uzten zuten paisaiaren eraketa-prozesuekiko eta gizakiaren esku-hartzearen ondoriozko eraldaketarekiko kezka. Izan ere, haren praktika, erreferentzia eta keinuz jositako ehun batean inskribatua, erabat definitu ezin den osotasun baten hondar eta inguruetara zeharka begiratuz eratzen zen. Alde horretatik, erakusketako obra askotan paisaia modernitatearen eraikuntza gisa agertzen zen, eta horrek makroproiektu handiak garatzeari bide ematen zion. Artistaren beste kezka batzuk erakusketaren hainbat unetan sumatzen zen, lehen industrializazioaren ondare materiala eta kontzeptuala eta haren aztarnak berrikustean.

2024ko azaroan, Ibon Aranberriri MACBA Fundazioaren lehen Saria eman zioten, Vista parcial eta Entresaka erakusketengatik. Sari horren helburua Espainiako eta Portugalgo artista garaikideen bikaintasuna aitortzea da, egungo panorama artistikoan duten eragina azpimarratuz. Epaimahaiak museo-espazioak irudimen sozialeko agertoki bihurtzeko duen trebetasuna nabarmendu nahi izan zuen, baita bere lanaren ezaugarri den koherentzia estetikoa ere.

Orain aurkezten den katalogoak zehatz-mehatz jasotzen du bi erakusketen dokumentazioa, bertan jasotzen ziren artelanak eta karteletako testuak.

Argitalpenaren diseinua Filiep Taqc-ek (Kortrijk. Bélgica, 1959) egin du. Testuei dagokionez, parte hartu dute Ruth Noack (Heidelberg. Alemania, 1964) komisario eta historialariak, Pasar un tiempo en Vista parcial testuarekin; Shep Steiner Kanadako historialaria eta arte kritikariak,La nieve lo cambia todo testuarekin; eta Miren Jaio irakaslea eta arte kritikariak (Bermeo, 1968) Di fronte e attraverso testuarekin. Hiru egileek Aranberriren azken hiru hamarkadetako ibilbideari begiratu diote.

Dagoeneko salgai dagoen argitalpena aurkezteko asmoz, Artium Museoak Ibon Aranberri artistaren eta Miren Jaio arte kritikariaren eta katalogoko testu baten egilearen arteko elkarrizketa antolatu du. Biek Aranberriren praktika errepasatuko dute eta erakusketa-proiektu honek suposatu duen mugarria aztertuko dute.