Oliver Laxek Sirāt filmaren unibertso sortzaile eta sentsorialetik abiatuta sortutako instalazio murgiltzaile bat hartuko du Tabakalerak datorren uztailetik aurrera. Zinema garaikideko azken urteetako filmik ospetsuenetako bat da Sirāt (Epaimahaiaren Sari Nagusia Cannesko Zinemaldian, 2025; sei sari 2026ko Goya sarietan; bi izendapen 2026ko Oscar sarietarako).

Reina Sofía Museorako sortu zuen HU/هُو. Bailad como si nadie os viera instalazioa, eta orain Tabakaleraren udako programazioaren erakusketa nagusietako bat izango da. Oliver Laxe bera izango da uztailaren 16an egingo den inaugurazioan, eta ekitaldian izango dira, baita ere, Reina Sofía Museoaren ordezkari Julia Morandeira, Ikasketa zuzendaria, eta Chema González, Zinema eta Medio Berrien burua, Madrilgo pinakotekan erakusketari forma eman zioten komisarioak biak.

Agirian diotenez, Donostia Zinemaldiarekin (SSIFF) lankidetzan instalazioa Tabakaleran antolatzeak agerian uzten du entitateen arteko sintonia, arte bisualen, zinemaren eta esperimentazioaren arteko lotura-modu berriak aztertzen dituzten proiektuei dagokienez. Aldi berean, erakusketa Tabakalera Kultura Garaikideko Nazioarteko Zentroaren lan-ildoekin bat datorrela azpimarratu nahi izan dute: diziplina desberdinen arteko elkarrizketa bultzatzea, artistei eta sortzaileei beren praktika artistikoak garatzen laguntzea eta jendarteari arte garaikidea adierazpen guztietan hurbiltzea.

Datozen asteetan emango dute erakusketaren xehetasun gehiago.