Richard Serra artista estatubatuarra (San Francisco, 1938) herenegun hil zen (martxoak 26) New Yorkeko bere etxean, 85 urterekin, eta pneumonia baten ondorioz. Haren abokatuak, John Silbermanek, baieztatu dio albistea The New York Times egunkariari.

Paisaian edo arkitekturan integratzen diren altzairuzko eskultura monumentalek egin zuten ezagun Serra mundu osoan, eta Bilboko Guggenheim museoan ikus daitezke haietako batzuk. Bilboko museoko lan ezagunenetakoak dira, hain zuzen ere.

Serrak oso gaztetatik izan zuen artearekiko lotura, eta amak berak sustatu zuen haren zaletasuna. "Richard artista" gisa aurkezten zuen lagunen artean, eta gerora eskultore ezaguna bihurtuko zenak bazekien sortzaile bat zuela bere barnean, nahiz eta garai hartan ez zekien nora bideratuko zuen bere talentua. Margoa izan zuen lehenengo tresna, baina Diego Velazquez pintore espainiarraren obra ezagutu zuenean, hura gainditzeko edo berdintzeko gai ez zela izango jakitun, pintura utzi eskulturan zentratzea erabaki zuen.

Serraren lanik enblematikoenak altzairu herdoilduzko eskultura handiak dira, ikusteko eta miresteko ez ezik, haien barnean mugitzeko eta galtzeko ere eraikiak daudenak. 2005az geroztik, Bilboko Guggenheim museoan dago molde horretako multzo inportanteetako bat, Denboraren materia deiturikoa. Forma esferikoko zazpi eskultura handik osatzen dute, eta museoko obra ezagunena da, Frank Gehryren eraikinarekin pare ia-ia.