Frank Auerbach, margolaritza figuratiboaren ikurra 93 urte beterik zendu da 2024ko azaroaren 11an. Familia judu bateko seme, Auerbach 1931ko apirilaren 29an Berlinen jaio eta 1939an Ingalaterrara igorri zuten nazien jazarpenetik ihes egiteko. Gurasoak Auschwitz-eko kontzentrazio esparruan hil zitzaizkion. Kent eskualdeko iheslari juduentzako Bunce Court School eskolan sartu eta goizik garatu zuen arterako eta antzerkirako grina. Britainiar nazio nortasuna 1947an eskuraturik, St Martin's School of Art eta Royal College of Art ikastetxeetan margolaritza ikasten zuen aldi berean, gauaz David Bomberg-en kurtsoak jarraitzen zituen Borough Polytechnic-en. Besteak beste Francis Bacon eta Lucian Freud biltzen zituen Soho artista zirkuluaren eraginpean, Auerbach gerra osteko margolari figuratibo britainiar nagusietakoa bilakatu zen.

Frank Auerbach Camden Town auzoan kokatu zen 1954an, zeina bere obraren gai zentrala bilakatuko baitzen. Bere estiloa margoaren loditasunarekin bereizten da. Margoa aplikatuz, karraskatuz eta berriz ere behin eta berriz aplikatuz, dentsitateak oihalaren egonkortasuna kolokan ezar zezakeen. The Guardian egunkarian irakur zitekeen egun batez adierazi zuela bere margolanen %95ak zakarrontzian bukatzen zuela, mintzaira bisual berri baten etengabeko bilaketa batean. Lagun minen potretak egin ditu, hala nola Estella West bizilagunarenak, Juliet Mills modeloarenak, denak giza-egia baten bila. Potretak egiteko saio haietan, modeloek sekulako pazientzia behar zuten, zeren saioak urte luzez luza baitzitezkeen, postura erregular eta unagarriekin. Lehen erakusketa pertsonala 1956an egin zuen, Beaux Arts Gallery-n eta David Sylvester kritikoaren goresmenak izan zituen: "Bacon-enaz geroztik bihotz pizgarriena". 1986an Bretainia Handia ordezkatu zuen Veneziako Biurtekoan, eta bertan, Sigmar Polke-rekin berdindurik eskuratu zuen Urrezko Lehoia. Erabateko goraipamena izan zen ohorezko ekitaldietatik bazterturik luzaz egon den artistarentzat. Frank Auerbach-en erretrospektiboa egin zen Hayward Gallery-n 1978an eta beste bat Tate Britain-en 2015ean, arte britainiarreko zutabe izaera berretsiz.