Erosketa ARCOren, arte garaikidearen azokaren esparruan egin da. Bertan, Kultura Ministerioak eta Reina Sofía museoak 22 artistaren 30 lan eskuratu dituzte guztira, eta horietatik 17 emakumeak direla nabarmendu dute, 553.000 eurotik gorako balio bateratuarekin. Aukeratutako lanen artean, Nora Aurrekoetxea eta Sahatsa Jauregiren lanak daude, otsailaren 24an Tabakaleran inauguratu zen Larruak eta izurrak erakusketan parte hartzen duten artistetako bi. Laura Vallés Vílchez da erakusketaren komisarioa eta euskal eskultoreen belaunaldi berri bat du ardatz. Aipatu artisten lanez gain, June Cresporen (2019tik MNCARSen bildumaren parte den artista) lanak ere ikusgai daude bertan. Gainera, Kimia Kamvari, Yael Davids, Iman Issa eta Lúcia Koch sortzaileek parte hartu dute erakusketan.

Kurba, Nora Aurrekoetxea

Larruak eta izurrak erakusketan, Nora Aurrekoetxea (Bilbo, 1989) artistak maitasunaren eta zaurgarritasunaren arteko harremana aztertzen duten bi eskultura-pieza aurkezten ditu, KAIA eta Erdibitu. Hormigoizko olanarekin eta eskuoihalekin, interdependentzia emozionalari eta minaren aurreko babesari buruz hausnartzera gonbidatzen gaitu. Aurrekoetxeak maitasunaren izaerari eta ezbeharren aurreko erresistentziari buruzko zalantzak pizten ditu bere obran.

Kurba, Reina Sofía museoak erositako lana, indarkeria, maitasuna eta beldurra bezalako sentimenduak uztartzen dituen ikerketa bat da, bolumenetan eta espazioarekin elkarrekintzetan islatuta. Aurrekoetxeak gorputz-hizkuntzaren eta hitzezko hizkuntzaren arteko harremanari buruz gogoeta egitera gonbidatzen du ikuslea, egunerokotasunaren eta intimotasunaren testuinguruan.

Izarrak, Sahatsa Jauregi

Tabakalerako erakusketan, Sahatsa Jauregik (Itaparica, Brasil, 1984) Azpitik doaz aurkeztu du, Tripak arte eszenikoen konpainiako kideekin partekatutako esperientzia islatzen duen altzairuzko lana. Gaur egun Andrea Berboisek, Maite Mugerzak, Marina Suarezek eta Natalia Suarezek osatzen duten kolektibo horrekin batera, Jauregik tresna, berun, protesi, arma eta gerren irudiak gogora ekartzen dituen dramaturgia bat sortzen du. Emakume horien arteko lankidetzak konfiantza eta narratiba bisual paregabea sortzen ditu, hirutan ikusiko dena erakusketa zabalik dagoen artean.

Reina Sofía museoak erosi duen Izarrak obra Sahatsa Jauregiren lan seriatu baten parte da, bere originaltasun eta sakontasun kontzeptualagatik nabarmentzen dena. Artistak objektuen mihiztadurak sortzen ditu, batzuk aurkituak eta beste batzuk manufakturatuak, giza gorputzaren atalen siluetak ehunezko elementuekin fusionatzen dituztenak. Tentsioz eta eraldatzeko aukeraz betetako konposizioak sortzen dituzte. Jauregiren lanek behin-behinekotasun espezifiko bat duakate, izaera performatiboa dute, eta gaur egungo gorputzetan eta identitateetan barneratutako teknologiari buruzko hausnarketa sustatzen dute.

Jarduera-programa

Larruak eta izurrak erakusketa soila izatetik haratago doa, eta publikoa esperientzia artistikoan aktiboki parte hartzera gonbidatzen du, zuzeneko esku-hartzeen eta programatutako jardueren bitartez.

Erakusketa-aretoan astero egiten diren feldenkrais saioez gain, Arte-makina arte garaikideari buruzko ikastaroa martxoaren 21ean hasiko da, Isabel de Naverán artean doktorearekin. Jardueren egitarauari jarraipena emateko, Tripak konpainiak Sahatsa Jauregiren piezan parte hartuko du, eta Beatriz Setienek, Antonio Menchenek eta Maia Villotek June Cresporenean, eskultura-piezak aktibatzeko eta elkarrizketa berriak sortzeko.