Lankidetza-hitzarmen berria sinatu dute, alde batetik, Bizkaiko Foru Aldundiko ahaldun nagusi eta Arte Ederren Bilboko Museoko Patronatuko presidente Elixabete Etxanobek, eta, bestetik, Gondra Barandiarán Fundazioko presidente eta museoaren Patronatuko kide Guillermo Barandiaránek.

2025-2028 aldirako hitzarmenak 400.000 euroko ekarpen globala ezarri du, prestakuntza-beken programa eta udako ikastaroaren urteko garapena sendotzeko. Berritasun gisa, hitzarmenak Kabinetea sortzea babestuko du, hau da, marrazketari, grabatuari eta argazkigintzari buruzko programa espezifiko bat hartuko duen erakusketa-gunea. Museoaren paper gaineko obren funts aberatsetan oinarrituta, erakusketa horiek Espainiako eta nazioarteko beste museo eta bilduma batzuetako mailegu garrantzitsuak ere hartuko dituzte.

Guneak 200 m² izango ditu 1970eko hamarkadako eraikin birgaituan, eta sarreran Gondra Barandiarán Fundazioaren aipamena izango du, mezenasgo-lanaren aitorpenez. 2026an irekiko da, Rafael Balerdiren (Donostia, 1934-Altea, Alacant, 1992) marrazkien erakusketa batekin, museoko Artxibo eta Dokumentazio Saileko Mikel Lertxundi historialariaren eskutik.

Gondra Barandiarán Fundazioa

Fundazioa eta museoa bat datoz prestakuntza eta ezagutza museografikoa sustatzeko helburuarekin, beken programa egonkor baten eta museoen kudeaketarekin lotutako alderdietan espezializatutako urteko udako ikastaro baten bidez.

2014tik gaur arte, 84 gaztek jaso dituzte bekak.

Bestalde, 2018tik, udako bost ikastaro egin dira, Miguel Zugazaren zuzendaritzapean eta Deustuko Unibertsitatearen laguntzarekin, eta 71 hizlari eta 620 ikasle (562 aurrez aurre eta 58 online) izan dira haietan.

Prestakuntza-beken XII. deialdia

Museoak eta Fundazioak sustatutako beka-programa honen XII. edizioak duen berrikuntza nagusietako bat da handitu egin dela zuzkidura ekonomikoa, hilean 750 euro gordin izango baitira bederatzi hilabeterako, eta hamar hilabetera arte luzatu ahal izango baita.

Museoko hainbat arlo eta sailetako profesionalekin batera, hautatutako pertsonek gaitasun berriak eskuratu ahal izango dituzte, beren prestakuntza-aldian lortutako ezagutza teorikoekin bat etorrita. Helburu horrekin, bekek aukera ematen dute lan-testuingurua ezagutzeko kudeaketa museografikoko zazpi arlo hauetan:

• Artxiboa eta dokumentazioa
• Liburutegia
• Arlo kuratoriala
• Edizio digitala
• Hezkuntza
• Erregistroa eta erakusketak
• Arkitektura

Deialdia zabalik, ekainaren 15era arte. Oinarriak eta izena ematea, hemen: www.bilbaomuseoa.eus

VI. Udako ikastaroa: (De)mostrazioa, Artistei eta artearen ideiei buruzko erakusketak - Ekainaren 25, 26 y 27an.

XVIII. mendeko aretoetatik bienal garaikideetara, erakusketa da museook eta bestelako erakunde artistikook erabiltzen dugun formatu nagusia, bai atzerabegirako ikuspegiak bai berrikuntzak ezagutarazteko, artistei eta artearen ideiei dagokienez.

Gaztelaniaz, sarritan "muestra" terminoa erabiltzen dugu "erakusketa" esateko. Izan ere, haren asmoa azaltzeko balia daitezke erro bera duten bi aditzek: artea erakustea ("mostrar"), eta, aldi berean, hura interpretatzeko modu bat demostratzea ikusleen aurrean, kritikotasunez.

Azken hamarkadetan, erakusketak izugarri hedatu dira, mundu osoan museo eta arte-gune berriak irekitzearen ondorioz. Efektu global horrekin batera, erakusketa-formatu berritzaileak agertu dira, teknologia digitaletatik eratorriak. Hizlari talde guztiz bikain batek –artistak eta museoen kudeaketan, kritikan, historian eta komisariotzan diharduten profesionalak– eramango gaitu fenomeno hori behatzera, eta, aldi berean, jardunbide garaikide onenekin bat egitera, eztabaida bat abiarazteko: erakusketa-formatuak eta arte-erakundeen programak egokiak dira oraindik, edo berritu egin behar ditugu?

Iberdrola dorrean egingo diren hitzaldien, topaketen eta mahai-inguruen agenda Prado Museoko zuzendari Miguel Falomirren hitzaldiarekin hasiko da, eta museo honetako zuzendari Miguel Zugazaren eta Guggenheim Bilbao Museoko zuzendari emeritu Juan Ignacio Vidarteren arteko solasaldiarekin amaituko da.

Gondra Barandiarán Fundazioa kulturarekin, prestakuntzarekin eta pentsamenduarekin

Gondra Barandiarán Fundazioaren sorrerako helburuen artean dago kultura, prestakuntza edo/eta pentsamendua sortzeko jarduerak garatzea eta sustatzea, edozein jakintza-adarretan prestatzeko laguntzak emanez. Eginkizun horren barruan dago, hain zuzen, 2014tik fundazioak eta museoak duten lankidetza. Lotura hori 2017an estutu zen, urte horretan Gondra Barandiarán Fundazioa museoaren Patronatuan sartu baitzen. Orain, berriz, gehiago estutu da, nabarmen handitu baitira prestakuntzako beken programara, udako ikastarora eta paperezko lanak erakusteko izango den Kabinete berrira bideratutako baliabideak.