Juncal Ballestín Nazioarteko Ikerketa Bekaren epaimahaiak, Artium Museoak deituta, aho batez erabaki du beka hori 2026ko edizioan Julia Coelhoren La línea orgánica entre Lygia Clark, Susana Solano y Ángeles Marco [Lygia Clark, Susana Solano eta Angeles Marcoren arteko lotura organikoa] izeneko proiektuari ematea. Proiektuak Artium Museoko bildumako parte diren Susana Solano (Bartzelona, 1946) eta Angeles Marco (Valentzia, 1947 - 2008) artisten praktiken arteko azterketa konparatibo bat proposatzen du, Lygia Clark artista brasildarrak (Belo Horizonte, Brasil, 1920 - Rio de Janeiro, Brasil, 1988) 1950eko hamarkadan formulatutako "ildo organikoaren" kontzeptutik abiatuta. Juncal Ballestín Nazioarteko Bekaren (Artium Museoko Euskal Emakume Artisten, Praktika Artistikoen eta Arte Feministaren Teorien Ikerketa eta Dokumentazio Zentroari atxikia) helburua arte feministaren historiografiaren garapenean laguntzea da, bai Euskal Herriaren testuinguruan, bai nazioartean, eta, era berean, museoaren programei eta bildumari lotutako emakume artisten eta pentsalarien ekoizpenak aztertzea.

Julia Coelho-ren (Salvador de Bahía, Brasil, 1990) proiektuak Susana Solanoren eta Angeles Marcoren ekoizpenen analisia planteatzen du "eskultura postraumatikoaren" noziotik, bakoitzaren ibilbideak garatu ziren diktadurako eta diktaduraren osteko testuinguruak kontuan hartuta.

Otsailean batzartu zen edizio honetako Juncal Ballestín Nazioarteko Bekaren balorazio-batzordea honako hauek osatu dute: Carolina Jiménez komisario eta ikertzaileak, HANGAReko Ikerketa programen eta ezagutza-transferentziako arduradunak, Oskia Ugarte, Huarte Arte Garaikideko Zentroko zuzendariak, Catalina Lozanok, Euskal Herriko Arte Garaikidearenk Museoaren komisario buruak, Arantza Santestebanek, Euskal Herriko Arte Garaikidearenk Museoaren Ikerketa eta Programa Publikoen komisarioak, eta Elena Roseras Carcedok, Euskal Herriko Arte Garaikidearenk Museoaren Artxiboa eta Dokumentazio Zentroko arduradunak. Batzordeak hautatutako proiektuaren kalitatea azpimarratu zuen, baita proposamenaren sendotasun kontzeptual eta metodologikoa ere. Horretaz gain, bildumaren funtsekin eta museoaren Dokumentazio Zentroaren ikerketa-lerroekin duen lotura zuzena eta esparru kritiko feminista eta postkolonialekin emakume artisten eskultura-praktikak artikulatzean egindako ekarpen historiografikoa nabarmendu zituzten.

Julia Coelho komisarioa eta idazlea da. Arte Ederretan graduatua São Pauloko Unibertsitatean (Brasil), Zientziaren Historiako masterra lortu zuen Bartzelonako Unibertsitate Autonomoan eta Bartzelonako Unibertsitatean. Haren praktika testuinguruarekiko sentikorra den arreta batetik abiatzen da, espazialtasunaren, pertzepzioaren eta mugimenduaren arteko harremanak aztertzeko. Bere proiektuetan, distortsioaren dimentsio politiko eta sentikorrak ikertzen ditu arkitekturatik, mikrohistorietatik, hizkuntza materialetik eta kontzientzia-egoera aldatuetatik abiatuta.

Juncal Ballestín Nazioarteko Bekaren helburua arte feministaren historiografiari eduki esanguratsua ematen dioten ikerketa-proiektuak babestea da, Euskal Herriko zein nazioarteko testuinguruetan, eta museoaren programazioari eta bildumari lotutako emakume artista eta pentsalarien ekoizpena aztertzea.