Egonaldi programak lotura estua du UPV/EHUko Arte Ederren Fakultateko Arte Garaikide eta Performatiboa Masterrarekin, eta ikerketa, sormena eta artearen, zientziaren eta teknologiaren profesionalizazioa sustatzea du helburu. Historian zehar, arteak askotan bat egin du zientziarekin eta teknologiarekin. Gaur egun, teknologiak gure egunerokotasunean izan duen bilakaerak eta ezarpenak aipatutako diziplinen bat-egitea eragin du, eta horrek arte-adierazpen berriak sortzea ekarri du; horiek izango dira, hain zuzen ere, Tabakaleran biziko diren praktiken ardatz nagusia.

Bost sortzaile izan dira aukeratuak martxoaren 17tik 31ra zabalik egon zen deialdian jasotako proposamenen artean. Gaurtik hasita, sei asteko egonaldia egingo dute Tabakalerako Artisten Gunean euren proiektu artistikoak garatzeko. Hauek dira egonaldia egingo duten sortzaileak eta proiektuak: Antton Goikoetxea: "s/t", Pama Canoles: Oleajes Eléctricos, Danel Garay: "La ciudad invisible", Victoria Ascaso: "Alma 1.0" eta Oriol Pares: "Quantum Harmonic Oscillator".

Tabakaleran egingo duten egonaldian aukeratutako sortzaileek euren proiektuak garatzeko tokia, testuingurua eta denbora izango dute. Gainera, UPV/EHUko eta Tabakaleko kideen laguntza jasoko dute, egitasmoen jarraipena egingo dute eta horiek garatzeko ezagutza teknikoa eskainiko dieten zenbait adituen laguntza ere izango dute. Egoiliarrak CIRCE (Creative Impact Research Centre) programarako Tabakalerarekin elkarlanean sorkuntza-prozesuetan lanean ari diren zenbait ikerketa-zentroetako profesionalekin eta artistekin harremanetan egoteko parada izango dute halaber. CIRCE kultura- eta sormen-industriei laguntza eskaintzeko eta industria horiek Europan duten eragina indartzeko Europa mailako gogoeta-taldea da. Nabarmentzekoa da UPV/EHU Tabakalera egonaldiaren azken egunak eta Europa osoko kultur eragileak bilduko dituen CIRCEren osoko bilkura egun beretan ospatuko direla Tabakaleran.

UPV/EHU eta Tabakalerak sustatutako egonaldi-programa Kultura Garaikidearen Nazioarteko Zentroaren Artea, Zientzia, Teknologia eta Gizartea lan-ildoaren barruan dago. Helburuetako bat sorkuntza artistikoko proiektuak zientziaren eta teknologiaren esparruko adituekin batera garatzea da.

Arlo horretan Tabakalera elkarlanean ari da dagoeneko erakunde esanguratsuekin. Esaterako, Basque Center on Cognition, Brain and Language (BCBL), BCC Innovation eta UPV/EHU. Sorkuntza eta elkarlan prozesu horien emaitzek aukera ematen dute herritarrekin gizartearentzat garrantzitsuak diren gaiak partekatzeko dibulgazio zientifikoa ez diren bideetatik. Horrela, ezagutza berriak sortu daitezke, errealitatearen irakurketa desberdinak ahalbidetu eta etorkizunerako agertoki berriak proposatu.