Veneziako Biurtekoko administrazio kontseiluak 2024ko azaroaren 5ean izendatu zuen Koyo Kouoh arte bisualen sektoreko zuzendari, eginkizun berezi batekin: 2026ko Nazioarteko Arte Erakusketaren 61. edizioaren zuzendaritza bermatzea.

Koyo Kouoh Kamerungo Duala hirian sortu zen 1967an. Gero Suitzan hezi zenez, hainbat hizkuntza menperatzen ditu: frantsesa, alemana, ingelesa eta italiera. Suitzan negozioen administrazio eta finantza ikasketak eta Frantzian kultur kudeaketa prestakuntza eginik, Dakarrera aldatu zen 1996an. 2008an RAW Material Company sortu zuen: arteari, ezagutzari eta gizarteari zuzendutako gunea, erakusketa eta artistentzako egonaldi leku bilakatzen dena.

2019an Hegoafrikako Lurmutur Hiriko Zeitz Museum of Contemporary Art Africa (Zeitz MOCAA) Afrikako arte garaikidearen museo handieneko zuzendari izendatu zuten. Kouoh-ren zuzendaritzapean, museoak komisariotza-taldea sendotu zuen, administrazio kontseilua ireki eta artistentzako egonaldi programak ezarri zituen.

Kouoh zenbait hezkuntza eta arte programaren zuzendari izan da, besteak beste Londres eta New Yorkeko 1-54 arte ferian, eta documenta 12 (2007) eta documenta 13 (2012) komisariotza-taldeetan parte hartu zuen.

2024an Veneziako Biurteko Adriano Pedrosa zuzendariaren segida hartu zuen. Kouoh izendatuz, Biurtekoak ikuspegi "kuratorial" orotariko eta inklusibo baten aldeko engaiamendua erakusten du. Honakoa esan zuen Kouoh-k bere izendapenaz: "Ohore handia da aitzinekoen urratsak segitzea; aitzineko zuzendari artistikoenak eta hortik erakusketa bat osatzea, zeina, agian, gaur egun bizi garen munduarentzat zentzuzkoa izanen baita - eta bereziki sortu nahi dugun munduarentzat."

1895ean sortutako Veneziako Biurtekoa munduko arte garaikideko erakusketa ospetsuenetakoa izanik, herrialde orotako artistak eta bisitariak erakartzen ditu. Bukatu berri den 2024ko edizioak 700.000 bisitari izan ditu.