Tabakalerak Nafidha. Magreb irudikatua jarduera sorta abiatu zuen joan den martxoan, Magrebeko eta Ipar Afrikako sorkuntza garaikidera hurbiltzeko asmoz, eta programazioak jarraipena izango du datozen asteetan, ekainaren 14ra bitarte.

Maiatzaren 5etik 24ra, Fermin Muguruzak komisariatu duen Ireki leihoak proiekzio programa eskainiko da Erakusketa-aretoan. Bere ekarpena sorkuntza garaikidea kontakizun ofizialak zalantzan jartzeko eta narratiba hegemonikoetan arrakalak irekitzeko tresna gisa ulertzen da. Nāfidha programarekin bat eginez, Ireki leihoak-ek bestelako memoria batzuk aktibatzeko borondatea partekatzen du, sarritan historia instituzionaletik kanpo geratzen direnak. Next Music Station (Fermin Muguruza) serie dokumentalaren Morocco, Tunisia, Egypt eta Lebanon atalak hartuko ditu programak, baita Checkpoint Rock - Kantak Palestinatik (Fermin Muguruza eta Javier Corcuera) dokumentala ere.

Maiatzaren 20an, 19:00etan, Next Music Station: Tunisia atala proiektatuko da, eta, ondoren, filmeko protagonista Badiaa Bouhrizi artista tunisiarrarekin solasaldia egingo da.

Hurrengo egunean, maiatzak 21, Badiaa-k kontzertua emango du Kutxa Klubean, 20:00etan (sarrera: 10 €), Kutxa Fundazioarekin lankidetzan.

Memoria eta erreparazioa

Maiatzeko programazioak bestelako proposamenak ere hartuko ditu. Hasteko, maiatzaren 6an, 19:00etan, Gazteria, migrazioa eta subiranotasun narratiboa: nork kontatzen du Maroko gaur egun? mahai-ingurua egingo da. Bertan Z belaunaldiak Marokon dituen erronka sozial, ekonomiko eta identitarioak ikusarazteko eta zalantzan jartzeko komikia eta argazkigintza funtsezko tresna bihurtu ote diren aztertuko dute Soraya Aybar Laafou kazetariak eta Zineb Koutten eta Zainab Fasiki sortzaile marokoarrek.

Halaber, maiatzaren 8an, 18:00etan, Tabakalerako Erakusketa-aretoan Alshams ekimena aurkeztuko da, Medialab Tabakaleraren eta Villa Salia proiektuaren arteko lankidetzari esker garatua. Proiektuaren ardatz nagusietako bat zaurgarritasun egoeran dauden kolektiboak ikusaraztea eta haien ahotsak zabaltzen laguntzea da.

Bestalde, maiatzaren 13an, 19:00etan, Tania Safura Adam ikertzaileak hitzaldia eskainiko du, Archivo Interrumpido: Espainia Beltzetik Artxibo Beltzetara, edo nola konpondu etorkizuna izenburupean. Safura Adamek erreparazioa izango du hizpide, ondare kolonialen aurrean memoria eta artxiboa zeharkatzen dituen praktika kritiko gisa planteatua, eta Artxibo Beltza proposatuko du, existentzia beltzak berhumanizatu eta birdefinitzeko espazio gisa.

Identitatea eta migrazioa: artxibo komunitarioa

Maiatzaren 26tik ekainaren 14ra, Harrotu ileak kolektiboak identitatearen eta migrazioaren inguruko programazioa aurkeztuko du. Nabil Aniss eta Lucia Feuillet artistekin elkarlanean sortutako In this night before I go out (Atera aurreko gau honetan) bideo-instalazioa izango da ikusgai erakusketa-aretoan, Diwan artxiboaren web-plataformarekin batera. Pieza horiek taldeak eraiki duen artxibo komunitarioaren parte dira, eta memoria, gorputza eta sorkuntza artistikoa abiapuntu hartuta, migrazio-esperientzia kontatzeko modu berriak esploratzen dituzte. Maiatzaren 29an, 18:30ean, lan kolaboratibo honetan parte hartu duten kideek aurkezpen publikoa egingo dute.

Azkenik, ekainaren 3an, 19:00etan, Erakunde irekiak, porotsuak. Bitartekaritza- esperientziak kultur erakundeetan topaketa egingo da, kultur erakundeak pertsona guztientzat —bereziki zaurgarrienak direnentzat edo kultura-testuinguruetan ohikoak ez direnentzat— irekiagoak eta abegikorragoak nola bihurtu aztertzeko eta proposamenak partekatzeko.

Ekitaldian Le Centquatre-Paris guneko, Bartzelonako Fabra i Coats zentroko L'Ordit – Cultura, Educació i Territori ekimeneko eta Al'Akhawat kolektiboko ordezkariek parte hartuko dute.