IREKIAK Gallery Weekend Donostia ekimenaren seigarren edizioa egingo da aurten maiatzaren 29tik 31ra; lehenengo aldiz, irailean izan ohi diren datak aldatu egingo dira. Egun horietan, Donostiako hainbat espazio artistikotan egingo diren erakusketa eta jarduerek programazio anitz eta erakargarria eskainiko dute. Ekimenaren egunak maiatzera aldatuta, hirian bereziki dinamikoa den unean kokatu nahi izan da ekitaldia: turismo-denboraldiaren eta udaren hasiera da, eta tokiko zein nazioarteko ikusleak elkartzeko garai ezin hobea. Hala, arte garaikidearen ikusgarritasuna eta galerien eta erakundeen arteko lana sendotuko dira, hiriko kultura-ehuna indartuz.

Donostiako Arte Garaikideko Galerien Elkarteak (DAGGE) ateak ireki ditu berriro, herritarrak sorkuntza garaikide berriena sustatzen eta erakusten duten guneetara hurbildu daitezen. DAGGEk, Donostia Kulturak eta Tabakalerak antolatu eta koordinatuta, IREKIAK Gallery Weekend Donostia urteko ezinbesteko hitzordua da hiriko arte, kultura eta turismoaren panoraman, eta arte garaikideari eskainitako nazioarteko beste topaketa batzuen bideari jarraitzen dio.

Jaialdiaren ardatz nagusietako bat, aurten ere, bisita gidatuak izango dira. Ekimenean parte hartzen duten galerietan zehar ibilbide inspiratzaileak proposatuko dira, artisten, galeristen eta ikusle mota ezberdinen arteko topaketa sustatzeko. Ibilbide horien bidez, IREKIAK ekimenaren helburua da arte garaikidea ikusle berriengana hurbiltzea, eta sortzaileek diziplina eta lengoaia anitzetatik egindako lanaren garrantzia nabarmentzea.

Instalazioak, performanceak, argazkigintza, eskultura, pintura, marrazketa, arte digitala edo proiekzioak izango dira IREKIAK 2026 edizio berri honen programazioaren parte; sei galeriatan egingo dira, hiriko hainbat txokotan banatuta: Cibrián galeria, La Central Art Gallery eta Arteko Gallery, Grosen; Ekain arte lanak, Parte Zaharrean; Arteztu galeria, Antiguan; eta Sakana Gallery, Egian.

AGENDA

Ostirala, maiatzak 29

• 17:30 - 21:00 | Galerietako erakusketen irekiera

Larunbata, maiatzak 30

11:30 | Bisita gidatuak

• Euskaraz: ARTEKO eta CIBRIÁN galeriak
• Gaztelaniaz: La CENTRAL eta SAKANA galeriak

17:00 | Bisita gidatuak

• Euskaraz: ARTEZTU eta EKAIN galeriak
• Gaztelaniaz: ARTEKO eta CIBRIÁN galeriak

Igandea, maiatzak 31

11:30 | Bisita gidatuak

• Euskaraz: La CENTRAL eta SAKANA galeriak
• Gaztelaniaz: ARTEZTU eta EKAIN galeriak

ORDUTEGIAK

Galeriak

• Ostirala, maiatzak 29: inaugurazioa 17:30 - 21:00
• Larunbata, maiatzak 30: 11:00 - 20:00
• Igandea, maiatzak 31: 11:00 - 14:00

Tabakalera

• Ostiraletik igandera: 11:00 - 13:00 / 16:00 - 20:00.