Sakonera ozeanikoko izakiak gogorarazten dituzten forma organiko eta fantastikoek hartu dituzte Mandasko duke-dukesen jauregiko hiru erakusketa-gelak abenduaren 15era arte. Cristina Enearen udazkeneko denboraldiko erakusketa da, Vanessa Barragão artistaren Submerso-Imerso. Eneko Calvo Cristina Enea Fundazioko erakusketa-proiektuetako teknikariak azaldu duenez, "Vanessaren pieza guztien emaitza liluragarria da, uretako mikrokosmos bat, bisitaria harridurazko eta intrigazko unibertso batera eramaten duena".

Artistak mundu naturalaren interpretazio abstraktua aukeratu du, eta horretarako ehunezko eta metalezko piezak baliatu ditu, gure ekosistemaren interkonexioa islatuz. Barragãok adierazi duenez, erakusketaren helburua "bisitaria itsas hondoetan murgiltzea da, itsas hondoa babesteko beharraz kontzientzia hartzeko, baita artista erakusketa eta arte-proiektuak eta -proposamenak garatzera eramaten duten sorkuntza-prozesuetan murgiltzea ere". Horrela, artistak uko egiten dio mundu naturalaren irudikapen literalari, interpretazio abstraktuago baten mesederako.

Pieza guztiak eskuz egin ditu Barragãok berak, antzinako teknikekin, batez ere artilea erabiliz. Artistak berak azaldu duenez, "adineko jendeak aspalditik egiten du lan hori etxean, batez ere emakumeek", eta bide batez alderdi hori "balioetsi eta ikusarazi" nahi izan du.

Vanessaren piezetan forma organikoak antzeman daitezke, baina obran bada fantasiazko zerbait, beste mundu bateko zerbait. Ia estralurtarrak dirudite piezek, beste planeta batekoak, "ozeanoen sakonean aurkitzen diren espezie eta izaki bitxiak bezala, edo artisten adimenak beren sortze-prozesuan bizi diren ideiak eta hausnarketak bezala, oraindik forma definiturik ez dutenak", azaldu du Barragãok.

Bideoan erakusketaren lehen irudiak ikus daitezke, baita artistaren adierazpen labur batzuk ere.