Mauméjean Anaiak frantziar enpresak egindako beirate bat (ca. 1900) da Nabarmendutako obra berria. Pieza Novelty Caférako (Boulevard 15, Donostia) egin zuten eta 1917an kafetegia itxi zutenean bertan irekitako Trust Joyero bitxitegian mantendu zuten. Beiraz eta berunez egindako pieza honek 2,18 x 2,28 m neurtzen du eta Gipuzkoako Foru Aldundiaren bildumatik dator. 2026ko apirilaren 26ra arte egongo da ikusgai San Telmo Museoko arte bilduma historikoaren aretoan.

Novelty Caféa 1900. urte inguruan hirian inauguratutako kafe-gozotegi dotorea izan zen, Boulevard zumardiko 15. zenbakian zegoen Echeverria familiaren jabetzako eraikin batean. Kafe, gozotegi eta te-areto gisa jaio zen, eta oso establezimendu berritzailea izan zen: koktelak prestatzen zituzten barmanak zituen, garai hartan hirian ezohikoa zena. Novelty irekia egon zen 1917. urtera arte, eta itxi ondoren Trust bitxi-denda ireki zen lokal berean, beiratea mantenduz.

Mauméjean Etxea garai horretako beirate enpresa nagusienetakoa zen. 1860an sortu zen Pauen, eta hasieratik nabarmendu zen eliza eta oratorioetarako beirateak manufakturatzeagatik. Baionako Katedrala edo Biarritzeko udaletxeko beirateak egin zituzten besteak beste. 1907 eta 1909 artean Donostian ireki zuten sukurtsala Donostiako Pedro Egaña kaleko 8. zenbakian, eta bertan egin zituzten garai hartako enkargu gehienak.

Beirate hau garai horretako merkataritza eta denden estetika eta dekorazioaren erakusle argia da.

Hitzaldia

La vidriera del café Novelty, Amaya Sánchez Bakaikoa, Ricardo Hernanz Maderuelo. | Urtarrilak 22, 19:00 (gazteleraz) | Ekitaldi aretoan / Sarrera librearekin lekuak bete arte + streaming.

Hitzaldian piezaz eta testuinguru historikoaz eta zaharberritze prozesuaz hitz egingo dute Amaya Sánchez Bakaikoak (zaharberritzailea eta kontserbatzailea, beirateetan aditua) eta Ricardo Hernanz Maderuelok (Burgosko Unibertsitatean doktorea "La Casa Internacional de Vidrieras Mauméjean y su entorno. Desde 1862 hasta nuestros días" tesiarekin).

Nabarmendutako obra

Nabarmendutako obra programa 2023an jarri zuen martxan San Telmo Museoak, denbora batez arreta obra jakin batera erakartzeko, bere ezaugarriengatik, gaurkotasunagatik edo bakantasunagatik azpimarragarria denean.

Sorreratik obra hauek izan dira programa honetan ikusi ahal izan ditugunak: Ozeanoko Perla bainuetxea (1910), Ramón Cortázarren akuarela; Pintura (1960-62) eta Adolescencia (c.a. 1948), María Paz Jimenezen olio pinturak; Amalia de Llano y Dotres, Condesa de Vilches (1853), Federico de Madrazo y Kuntzen olio pintura (azken hau Museo del Pradoren lankidetzarekin), Izenbururik gabe (1922) Néstor Martín Fernández de la Torreren olio lana, eta Tête eskulturarako modeloa (ca. 1978), Joan Mirórena.