San Telmo Museoak argazki-liburuen jarduerak martxan jarri ditu
Urria iristearekin batera, eta hilaren 14an ospatzen den Argazki-liburuaren Nazioarteko Egunaren harira, San Telmo Museoak formatu artistiko honekin lotutako programazioari ekingo dio berriro. Bryan Schutmaat estatubatuarra, Ricardo Cases valentziarra eta bertakoak ditugun Nagore Legarreta eta Miguel Leache bezalako artistak izango dira datozen hilabeteetan.
| 2024ko Urriaren 9a
San Telmo Museoak Gabriela Cendoyaren argazki-liburuen bilduma kudeatzen du; hala, bildumazaleak 2017an bertan utzi zituenetik, 3.300dik gora ale doan kontsulta daitezke museoko liburutegian, argazki-liburuen unibertsora sartzea errazteko. Helburu berberarekin, museoak urtean zehar hainbat jarduera programazten ditu argazkilari askok erabiltzen duten argazkilaritza genero hau ezagutarazteko.
Museoak bat egingo du Argazki-liburuaren Nazioarteko Egunarekin, eta liburutegia propio irekiko die Mondragon Unibertsitateko Ikus-entzunezko Komunikazioko graduko 1. mailako ikasleei. Gainera, urriaren 12an, Photo Book Club San Sebastián museoko liburutegian bilduko da, bertako kide batzuk bere argazki-liburuen maketak aurkez ditzaten.
Urte amaiera bitarteko jarduerak
Jarduera guztietan sarrera doakoa da lekuak bete arte
An evening whit Bryan Schutmaaat
BRYAN SCHUTMAAT + GABRIELA CENDOYA, urriak 24, osteguna, 19:00 (ENG, aldibereko euskara eta gaztelaniako itzulpenarekin).
Bryan Schutmaat argazkilari estatubatuarra Donostian entzuteko aukera izango da. Gabriela Cendoyarekin solasean arituko da Sons of the Living lan berriaz, bere ibilbide artistikoaz, argazki-liburuen unibertsoaz eta Trespasser Books editorialaz. Bere beste lan ezagun asko liburutegian daude eskura: Grays the mountain sends (2013), Good Goddamn (2017), County road (2023).
Jarduera hau Bilbon urriaren 24tik 31ra izango den Basque Dok Festival Euskal Herriko Argazki Dokumentalen Jaialdiaren bosgarren edizioarekin batera antolatu da.
Suzko irudiak
NAGORE LEGARRETA, azaroak 23, larunbata, 12:00 (EUS)
Argazkigintza estenopeikoan espezializatutako argazkilaria, Nagore Legarretak pospolo kaxa batean eraikitako kamera batekin Indian hartutako irudiekin osatutako argazki-liburu honen sortze prozesua azalduko digu. Legarretak Suzko irudiak argitalpenera arteko ibilbideaz hitz egingo digu, baita bere proiektu berriez ere. Liburutegiak artista honen hainbat argitalpen ditu: Edipotoa: kamera estenopeika (2013), Hysteron (2016).
Kontxako tamarindoak
RICARDO CASES, azaroak 30, larunbata, 12:00 (CAS)
Oraingoan, Ricardo Cases etorriko zaigu berriz ere bisitan. Kutxa Fundazioaren Artegunean, 2024ko azaroaren 29tik 2025eko martxoaren 2ra ikusgai izango den Kontxako tamarindoak erakusketa lagunduko duen argazki-liburuarekin izango da museoan. Erakusketa eta argazki-liburua Kutxa Fundazioak 2024an proposatutako Donostiako egoitza artistikoaren emaitza dira. Fanzine horiek kanpoko hiri-ingurune batean egunero egindako argazki-miaketan harrapatutako irudiak jasotzen dituzte, berehala editatu eta argitaratuak. Hitzaldi hau San Telmo Museoko Donostiaren oroigarri: Galarza argazki bilduma"erakusketaren programazioaren barne dago.
Casesen argazki-liburu batzuk STMn: Belleza de barrio (2008), La caza del lobo congelado (2009), Paloma al aire (2011), Estudio elemental del Levante (2020)...
Miss Diciembre 1854
MIGUEL LEACHE, abenduak 14, larunbata, 12:00 (CAS)
Urtea amaitzeko, Miguel Leache nafarra izango dugu, Miss Diciembre 1854 izeneko bere azken autoargitalpena aurkezten. Erroman egin zituen azken argazki-egonaldiei esker, Leachek E.M. Cioran aipatzen du bere lan berria ezagutzera bultza gaitzan: "inori kontatzen ausartuko ez ginatekeen gauzak esateko bakarrik idatzi beharko lirateke liburuak".
Liburutegian kontsulta daitezkeen Leacheren argitalpenak: Por los días felices (2013), Rápido REM (2022), Ibiza 2008 (2024) eta Miss Diciembre 1854.
