Euskal Herriko Arte Garaikidearen Museoak-Artium Museoak eta Zas Kulturrek Flx. Javier Larreinaren Acciones para (re-)conocer (edo (Ber-)ezagutzeko ekintzak) proiektua aukeratu dute bi espazioek lankidetzan aurreko ekainean argitara emandako artistentzako egonaldian garatzeko. Ekimenaren helburua Araban sorkuntza garaikidea lantzeko eta laguntzeko esparru bat eskaintzea da, artista gazteei laguntza, baliabide teknikoak eta ikusgarritasuna eskainiz. Hautatutako proiektuak 1.500 €-ko zuzkidura du ekoizpen kontzeptuan.

Ekainean deitutako deialdia Arabarekin lotura duten artistei zuzenduta eta sorkuntza garaikidea sustatzeko helburuz antolatutako ekimena da, elkarlanerako lan-eremu baten testuinguruan eta profesionalen laguntzaz proiektu bat garatzeko interesa duten 35 urtetik beherako artistei begirakoa. Ekimenaren bidez, ikusgaitasun-espazio berri bat eta sorkuntza garaikidea sustatzeko laguntza eman nahi zaio Arabako Lurralde Historikoko artearen testuinguruari. Epaimahaia Artium Museoaren eta Zas Kulturren ordezkariek osatu dute eta jasotako 11 eskari aztertu dituzte. Euren esanetan, guztiak nabarmendu dira kalitatea, planteamendu-aniztasuna eta ikuspegien sendotasunagatik. Azken erabakia proiektuaren kalitatea eta berrikuntza, proposamenaren bideragarritasuna eta parte-hartzaileen ibilbide artistikoaren arabera hartu da.

Egonaldiak uztailaren 21etik abuztuaren 31ra bitartean iraungo du, eta Artium Museoan lan-espazio bat izango du, bai eta museoko lantaldeen eta Zas Kultur lantaldearen laguntza ere. Azken horrek, gainera, bere espazioa ere jarriko du artistaren eskura, laguntza-ingurune gisa. Baliabideen konbinazio horren helburua sorkuntza-, gogoeta- eta elkarrizketa-prozesu aktiboa bultzatzea da.

Larreinaren jarduna eskulturaren arloan kokatzen da. Interes berezia du erakusketen muntaketari eta desmuntaketari buruz, eta gogoetarako gaitzat du lan artistikoa jendaurrean erakutsi aurretik eta ondoren gertatzen dena. (Ber-)ezagutzeko ekintzak proiektuaren dosierrean agertzen denez, "TFGaren defentsaren ondoren gertatu zen proiektu honetarako lehen hurbilketa", artistak erabaki baitzuen espazioan kokatutako elementuak desmuntatzeko lanak grabatzea, "etorkizunerako oroigarri modura, ikerketarako gai bihurtzeko asmorik gabe". Metodologia hori jarduerara hurbiltzeko modu bihurtu zen, gero, eta formaren eta espazioaren arteko akzio-erreakzio iraunkorrean gauzatu. Larreinak Artium Museoko egonaldiaren lau asteetarako aurkeztutako proposamenak museoko arlo guztietan lanean diharduten langileekin partekatutako zenbait ekintza barne hartzen ditu.

Flx. Javier Larreina Morales (Gasteiz, 1999) Arteko graduduna da eta Ekoizpen Artistikoko masterreko ikasketak egin ditu (EHUn). Talde-erakusketetan eman du ezagutzera bere lana, zenbait hiritan, hala nola Gasteizen eta Bilbon nahiz Valentzian, Madrilen eta Logroñon ere. Hainbat egonalditan parte hartu du eta JAIren 2024ko edizioan parte hartu zuen, baita Gaztearen txokoa 2n ere.