Estatuko eta atzerriko epaimahaikideentzat 1.500 euroko aurrekontua dugu EHUn. Horrekin bi lagunen dietak, bidaia eta bina hotel gau ordaindu behar dira, batzuetan hiruna, bueltako bidaien ordutegien arabera. Orain urte gutxi arte antolaketa hau ez zen zaila. Bilbo ekitaldi handien zirkuituan sartu denetik, berriz, epopeia bat da kontua. Adibiderik onena, azaroaren 18koa: EHUrekin akordioa duen hotelak, printzipioz 90 euro inguruan gela eman beharko lukeenak, 495 euroko aurrekontua aurkeztu zuen… gau eta pertsona bakoitzeko. 1.980 euro guztira, bidaiak gehitu gabe.

Athleticek partida handia izango zuela otu zitzaigun hasieran, baina ez, hurrengoa abenduaren 10ean du —zoritxarrekoa egun horretan tesi baten epaimahaian, edo beste ezertan, aritu behar duena—. Baina, kirola edozein manifa baino eraginkorragoa bada ere Bilbo blokeatzeko, ez da modu bakarra: azaroaren18tik 20ra bitartean Enlit Europe feria egingo dute,energia sektorearen elkargune nagusietako bat;eta energiak dirua mugitzen duenez, prezio guztiak disparatu dira. Tesia atzeratu dugu, noski. Unibertsitate publikoak ezin ditu eta ez lituzke halako prezioak ordaindu behar.

Hau salbuespena balitz, gure lagunaren zorte txarra kafean komentatu eta pasadizoa ahaztuko genuke. Baina 2023an, Tourra Bilbon hasi zenean, beste lankide bateketxean hartu behar izan zuen Gasteizen egin zen kongresu bateko hizlari bat, hanere alojamenduak agortu zirelako. Eta ez dut jakin nahi nola den kontua Donostian. Lehen, uztaila tesiak aurkezteko epe ona izaten zen, klaserik ez badugu ereikerketa lanetan jarraitzen dugulako. Izaten zen: turismoarekin, festibalekin eta kirol ospakizunekin gero eta zailagoa baita unibertsitate publiko batek maneiatzen dituen aurrekontuekin ezer antolatzea. Eta gero eta maizago, azaroko —edo otsaileko, edo apirileko…—edozein asteazken sar daiteke uztailaren poltsa berean.

Behin eta berriz esaten digute denontzat dela ona turismoa. Lau egunean 50.000 euro aterako dituen hotel jabearentzat, ziur. Baina, aurrekontua igoko ez dioten unibertsitate publikoarentzat, zeina guztiona den etazeinak euskal gizartea heztearen betebeharra duen, zertan da ona harentzat? Ostalaritzak irabaziko zuen dirua zergen bidez birbanatuko omen zen, baina partidetako Ertzaintzaren dispositiboetan, zabor mendiak garbitzen eta txikitutako espazio publikoak konpontzen joaten ei zaigu diru hori guztia.