Arte garaikidearen erakusketa-denboraldia astebete barru hasiko da Irekiak Gallery Weekend egitasmoaren eskutik. Gaur, irailaren 7an, aurkeztu dute ekimenaren hirugarren edizioa Donostiako Arte Galeria Garaikideen Elkarteak (DAGGE), Tabakalerak Kultura Garaikidearen Nazioarteko Zentroak eta Donostiako Udalak. Egitasmoak arte garaikidea herritarrei hurbiltzea du helburu, eta horretarako, arte galerietako ateak zabalduko zaizkie hiritarrei, obrak ezagutzeko eta modu berritzailean gozatzeko aukera emanez.

Aurtengo edizioan Altxerri, Arteko, Arteztu, Cibrián, Ekain eta Villa Magdalena arte galeriek hartuko dute parte, eta 6 erakusketa eskainiko dituzte. Tabakalerak, halaber, Kursaal Kongresu Jauregiaren fatxadan proiektatuko den Gradients obrarekin parte hartuko du.

Irekiak Gallery Weekend egitasmoak arte garaikidea modu hurbil eta desberdin batean erakustea du xede, eta Donostiako galeriak kultura sortzeko eta sustatzeko espazio gisa aurkeztu nahi ditu, egiten duten lana ikusarazteko eta hedatzeko. Izan ere, DAGGEko kideek azpimarratu bezala, "galeriak espazio irekiak dira, eta urte osoan zehar bertako zein kanpoko arte garaikidea ezagutzeko aukera eskaintzen dute". Horrez gain, Irekia programak bildumazaletasuna arte garaikidearen garapenerako konpromiso gisa erakutsi nahi du, eta aurtengoan, erosketa-sari bat banatuko da Kutxa Fundazioaren eskutik.

Bisita gidatuak

Irekiak programaren indargunea bisita gidatuak dira. Iazko esperientzia erabat arrakastatsua izan zen, eskainitako leku guztiak betetzeaz gain, parte-hartzaileek oso modu positiboan baloratu baitzuten galerietan sartzeko eta erakusketak hain modu desberdinean ezagutzeko aukera; zenbait kasutan, artistek eurek emandako azalpenen bidez hurbildu ziren obretara.

Aurtengo bisita gidatuak bi ibilbidetan antolatu dira. Bisitak doakoak dira eta derrigorrezkoa da aurrez izena ematea. Xehetasunak agendan.

Kursaaleko proiekzioa

Irekiak programako bigarren ekimen esanguratsua Tabakaleraren eta Kursaalen lankidetzatik jaiotako fatxadako proiekzioa da. Playmodes kolektibo artistikoak, Kultura Garaikidearen Nazioarteko Zentroaren babesarekin eta Kursaalekin elkarlanean, sortutako GRADIENTS obra irailaren 14an inauguratuko da, 20:30etan. Irma Vilá y ÀƒÂ'dena ikertzaile eta kultura sustatzailea da obra honen komisarioa.

Era berean, Irekiak egitasmoarekin bat eginez, Isabel Herguera-ren El sueño de la sultana erakusketa inauguratuko du Tabakalerak hilaren 15ean, That Time. Arte Ederren Bilboko Museoa-Tabakalera erakusketarekin batera ikusgai egongo dena, 2024ko urtarrilera arte.