Mutur Beltz familiak Ondo Bizi Arte Egonaldiaren zortzigarren edizioa egin zuen 2024ko ekainaren 4tik 16ra bitartean, aurreko edizioetan ezarritako lan-ildoari jarraituz. Ekitaldi horrek sakondu egin zuen Karrantzako artzaintzari, bertako ardiari eta beraren artileari buruzko diskurtso berrien esplorazioa. Bizikidetza eta hausnarketarako espazio gisa sortua, egonaldiak funtsezko kontzeptu batzuk integratu zituen, hala nola burujabetza, jasangarritasuna, agroekologia, gizarte-harremanak eta subjektibotasunaren forma desberdinak. Ekimenak arteari buruz proposatu zuen ekimena sorkuntza artistikotik harago doa, zeren kontsideratzen baitu artea lurraldeko prozesu natural eta komunitarioei estu lotuta dagoen bizimodu bat dela.

Mutur Beltzek urtero bi erakusketa antolatzen ditu egonaldian gauzatutako lana erakusteko. Horietako bat Karrantzako landa- eta toki-ingurunean egiten da, eta bestea hiri-espazio batean. Urtero, leku berri bat bilatzen dute egindako lana konpartitzeko, eta oraingoan erakusketak leku hauetan egingo dira: UPV/EHUko Arte Ederren Fakultatean, azaroaren 15etik 28ra, eta Karrantzako Kultur Etxean, abenduaren 9tik 20ra. Amaiera gisa, parte-hartzaile guztien obrak eta hausnarketak biltzen dituen argitalpen bat aurkeztuko da Naubis liburu-dendan, Santutxu auzoan.

Edizio honetan, Niño de Elche izan dugu parte-hartzaileen artean, hau da, bere ikuspegi transgresoreagatik eta askotariko genero artistikoak fusionatzeko duen gaitasunagatik aitortza lortu duen artista bat. Bisitariek beraren "Gure Aita" (Padre Mío) proiektua dokumentatzen duen bideo batez gozatu dezakete; berau soinu-paseo immertsibo bat da, 2023ko udazkenean Karrantzan egin zuen ikerketaren emaitza gisa sortua. Lan horrek paisaia oroimenarekin eta denboraren joanarekin konektatzen duen hausnarketa sakon bat eskaintzen du.

Halaber, Idoia Cuesta eta Enara Conde Moreno artistek ere parte hartu zuten. Idoia Cuesta, Galiziako landa-ingurunean bizi den euskal artista, Artisautzako Sari Nazionalaren irabazlea izan zen, eta ezaguna da saskigintzaren eta hainbat materialen antzinako teknikak modu berritzailean fusionatzeagatik. Karrantzarako egindako proposamenean, Idoiak Karrantzako ardien artilearekin lan egin zuen, formatu desberdinetan –artile kardatua, feltroa, haria, besteak beste-, saskigintzaren teknika tradizionalak landare-zuntzekin batera aplikatuz. Gainera, Karrantzan bardanaska izenez ezagutzen den zuntz naturalen artisau-ehuna ikertu zuen, eta hurritz-makilaren erabilerak esploratu zituen, gorputzari eta espazioari lotuta.

Enara Conde Morenok, berriz, -deialdi publikoaren bidez aukeratua izan zen-, Karrantzako artzaintza dokumentatu zuen zuzenean egindako marrazkien bidez, eta gero aho-grabazioekin eta argazkiekin osatu zuen lan hori, landa-inguruneko kultura eta erresilientzia atzemateko. Erakusketa honetan aurkezten dituen marrazki txikien serieak iraunarazi nahi du desagertzeko arriskuan dagoen espezie baten esentzia, eta baita Karrantzako landa-bizitzaren edertasun efimeroa ere.

Zortzigarren edizioa Arte eta Artzaintzari buruzko Jakintzen Topaketarekin bukatu zen; bertan, Arturo Comasek landa-artearen kudeaketaren inguruan duen esperientzia konpartitu zuen Genalguacil Pueblo Museo-tik. Bere hitzaldiak aukera paregabea eskaini zuen hausnartzeko arteak landa-bizitzan duen inpaktuaz eta testuinguru horietan identitatea indartzeko eta garapena sustatzeko duen ahalmenaz. Ekarpen baliagarri horiek erakusketarekin batera eskaintzen diren elkarrizketa-bideo multzo batean entzun ahal izango dira; hor, gainera, parte hartu zuten artista guztien ikuspegiak ere jaso dira.

Zortzigarren edizio honek berresten du sorkuntza artistikoarekin eta landa-komunitateak biziberritzearekin hartuta dugun konpromisoa, lurraldeaz, oroimenaz eta ingurunearekin modu orekatuan bizitzeko forma berriaz hausnartzera gonbidatuz.