Tabakalerak urteko lehen erakusketa inauguratu du, Eremu magnetiko lehor bat. Santiago F Mosteyrín artistaren erakusketa indibiduala da, Garazi Pascualek eta Iván Gómezek komisariatua. Gaurtik martxoaren 30era arte egongo da ikusgai Tabakalerako 2 erakusketa-aretoan.

Erakusketa-proposamenak hauskortasuna aztertzen du ikuspegi sentsorial, tekniko eta tematikoetatik, eta ikusgaiaren eta inplizituaren arteko harremanei buruz gogoeta egitera gonbidatzen du publikoa. Irudi anbiguo eta teknika sotilen bidez, F Mosteyrínek pertzepzioaren mugei aurre egiten dieten paisaia distortsionatuak sortzen ditu. Eremu magnetiko lehor bat-ean gaian nahiz teknikan aditzera ematen da hauskortasuna. Materialen urratuek eta higadurek forma zaurituez eta gorputz zatitu, erresistente eta sentsualez jositako geografia batean murgiltzera gonbidatzen gaituzte.

F Mosteyrínen lanak babesaren eta zaurgarritasunaren arteko paradoxa ere jorratzen du. Horretarako, erradiaziotik babesten duten "eremu magnetikoez" baliatzen da; hausten direnean, ordea, gizakiok berezkoa dugun ahultasuna uzten dute agerian. Hauskortasuna existentziaren berezko egoeratzat hartzera gonbidatzen ditu bisitariak.

Tabakaleraren komisariotza-egonaldiak egiteko deialditik sortutako erakusketa da hau. Deialdi horren helburua da tokiko eszena artistikoa sustatzea eta komisarioei eta artistei laguntzea, euren proiektuak zentroaren urteko erakusketa-programan sartuta.

Artista: Santiago F Mosteyrín

Santiago F Mosteyrín (Madril, 1982) artista eta biologo gisa trebatu da hainbat unibertsitate eta testuingurutan. Bere lana gainazalaren nozioaren esplorazio gisa garatzen da, bi alderdi edo jarrera ardatz hartuta: erotismoa eta erresistentzia, karga performatibo handia duten objektu eta irudien bidez. Bere obra, besteak beste, leku hauetan erakutsi da: Bulegoa z/b, Fresh Gallery, Stedelijk Museum Bureau Amsterdam (SMBA), La Casa Encendida eta Mallorcako Fundació Pilar i Joan Mirón. Beste erakunde batzuetan artista egoiliarra izan da ere, tartean Jan Van Eyck Academien, BilbaoArte Fundazioan eta The Croft/PROARTIBUSen, Tammisaari (Finlandia). Irakasle gonbidatua izan da Artistic Research masterrean, Universiteit Van Amsterdamen, eta Dantza graduan, Codarts eskolan (Rotterdam).

Komisarioak

Garazi Pascual (Bilbo, 1987) Filosofian doktorea Bartzelonako Unibertsitate Autonomoan, Estetikan eta Arte Garaikidearen Teorian espezializatua. Bi master egin ditu, bata Filosofia Garaikidean eta bestea Arte Garaikidearen Teorian, Bartzelonako MACBArekin, Picasso Museoarekin eta Miró Fundazioarekin lankidetzan. Euskal Herriko artearen eta politikaren arteko lotura aztertzea da bere tesiaren ardatza. Filosofian eta arte garaikidean espezializatutako hainbat kongresutarako artikuluak idatzi eta haietan parte hartu du, estetika garaikideari buruzko testuekin. Kolaborazioak ere egiten ditu artistekin eta Agora filosofia elkartearekin, filosofia espazio ez-akademikoetara hurbiltzea helburu duena. Filosofiako irakaslea da Bigarren Hezkuntzan.

Iván Gómez (Irun, 1984). Bere praktikan kezka progresibo bat nabarmentzen da irudiak, objektuak, espazioak eta pertsonak erlazionatzen diren moduekiko. Diziplina desberdinetan hibridatzen den lana da, eta horietan erlazioaren gaian jartzen du arreta, "arteko" horretan eta horri heltzeko modu desberdinetan. Nozio hori zinetik, praktika artistikotik, komisariotzatik, bitartekaritzatik eta idazketatik lantzen jardun du. Arte Ederretan lizentziatua UBn, Arte Ikerketa eta Sorkuntzako Masterra UPV/EHUn, eta Arte Garaikidearen Kuradoretzako Kritika eta Profesionalizazio ikastaroak egina NODE zentroan (Berlin). Hainbat komisariotza eta bitartekaritza egin ditu testuinguruetan, besteak beste Azkuna Zentroa-Alhóndiga Bilbaon, ARCO-Lisboa azokan, Rekalde aretoan eta Artelekun. Obrador kultur elkarteko (Bilbo) presidentea da, eta bertako bazkideekin batera, elkartearen urteko erakusketa-programazioa komisariatzen du.

Jarduera paraleloak

Gaur irekiko den erakusketaren inguruan hainbat jarduera osagarri antolatu dira, tartean bisita gidatuak eta arte garaikidera hurbiltzeko ikastaro bat.