Tabakalerak (Kultura Garaikidearen Nazioarteko Zentroa) eta Artium Museoak (Euskal Herriko Arte Garaikidearen Museoa) elkarlanean antolatutako JAI -Jardun Artistikoentzako Institua izeneko ikasketa-programa, 2022tik aurrera Jorge Oteiza Museoa Fundazioaren lankidetza izan duena, gaur hasi da Vitoria-Gasteizko museoko lantegi eta espazioetan. Datozen bi hilabete eta erdian eskolaren bosgarren deialdian hautatutako hamasei lagunek parte hartuko dute —hiru erakundeen programei lotutako nazioarteko artistak irakasle dituztela— ikasketa-programan. Uztailaren 8tik aurrera eskola Tabakaleran garatuko da, eta abuztuko azken astean itzuliko da Artium Museora, tartean Oteiza Museoan egonaldi labur bat egin ondoren. JAI udako eskolaren muina jardun artistikoa da, eta ikerketa, ekoizpena eta lan kritikoa sustatzea ditu helburu.

JAI, Jardun Artistikoentzako Institutua, Artium Museoak eta Tabakalerak elkarlanean antolatutako ekimena da, eta arteen arloko profesionalak trebatzen laguntzea du helburu, truke eta gurutzaketa artistikoetarako espazio bat sortuz. JAIk ezagutzaren transmisioan sakondu nahi du, prestakuntza-prozesuan dauden artisten eta nazioarteko profesionalen arteko trukerako espazioak eraikiz.

Ekoizpenarekin lotutako ezagutzaren transmisio hori indartzeko, JAIko irakasleak bosgarren edizio honetako deialdia sustatzen duten erakundeen erakusketa-programen eta programa publikoen parte dira. 2024an honako hauek izango dira irakasleak: Patricia Dauder (Bartzelona, 1973), Jeremiah Day (Plymouth, Estatu Batuak, 1974), Imán Issa (Kairo, 1979), Hilary Lloyd (Halifax, Ingalaterra, 1964) eta Iñaki Garmendia (Ordizia, 1972). Tutoreak, berriz: Olatz Otalora (Algorta, 1990), Alejandro Cesarco (Montevideo, Uruguai, 1975), Itziar Okariz (Donostia, 1965) eta Ibon Aranberri (Itziar-Deba, 1969) artistak.

Prestakuntza-saioak ekainaren 26tik abuztuaren 30era bitartean egingo dira. Ikastaroa Artium Museoan hasiko da, eta uztailaren 5era arte egongo dira bertan ikasleak. Uztailaren 8tik abuztuaren 23ra arte, Tabakaleran jarraituko dute, eta hil horren 26an Gasteizera itzuli eta 2024ko JAI udako eskola amaituko dute. Abuztuan, parte-hartzaileek egonaldi bat egingo dute Altzuzan, Oteiza Museoa Fundazioa dagoen herrian.

Ikasketa-programa artearen jardueraren inguruko elkarrizketak eta horiek sortzen dituzten lengoaietan eta subjektibazioan beste bide batzuetatik barneratzeko gaitasuna zabaltzeko aukera ematen duen baliabide gisa aurkezten da. Planteatutako mekanika diseinatuta dago artista-irakasle bakoitzak prozesu horien ikuspegi berezia eskaintzeko. Ezaugarri horrek programaren metodologia gehiago kokatzen du lantegiaren espazioan ehuntzen diren harremanetan eta praktika zehatzetan teorian baino. Vitoria-Gasteizko Artium Museoan egingo diren saioek lotura estua dute museoan ikusgai dauden Patricia Dauderren eta Ibon Aranberriren erakusketekin, baina Tabakaleran, lantegiko praktika eta parte-hartzaile bakoitzaren prozesuaren garapena izango dira ardatz.

JAIren bosgarren deialdirako 50 hautagai baino gehiago agertu ziren, eta horien artean, 16 parte-hartzaile aukeratu, txostenean aurkeztutako artelanaren interesaren eta kalitatearen arabera eta hautagaiek beren aurkezpenetan helburuak izendatzean ikasketa-programaren ildoekiko adierazitako egokitasunaren arabera. Hautaketak, gainera, parekotasun-irizpideei erantzuten die, eta, azkenik, talde anitza eta askotarikoa osatu da parte-hartzaileen jatorri geografikoari, belaunaldiei eta arte garaikidearen praktiketan dauden lengoaia eta diziplinen aniztasunari dagokienez. Batzordeak, era berean, parte-hartzaileetako lauri matrikula- eta mantenu-bekak ematea erabaki zuen.