Euskal Herriko Arte Garaikidearen Museoak, Artium Museoak, Juncal Ballestín. Artxiboa argitaratu du, artistaren funts dokumentala aztertzen duen eta arte-ekoizpenaz haragoko haren lanaren inguruko argibideak ematen dituen liburua. Argitalpen hau Anesvad Fundazioak dohaintzan emandako Ballestínen (Gasteiz, 1953-2015) artxiboaren inguruan Artium Museoko Dokumentazio Zentroak egindako lanaren emaitza da. Besteak beste, testu eta eskuizkribu, diseinu grafikoko pieza eta bitxi, eszenografiako pieza, antzerkirako atrezzo eta irakaskuntza-jarduerarekin lotutako dokumentu sorta bat erreproduzitzen du. Juncal Ballestín. Artxiboa liburuan, gainera, Fernando Illana artista eta galeristaren (argitalpen-proiektuaren zuzendaria), Enrique Martínez Goikoetxearen (Artium Museoko kontserbatzailea) eta Elena Roserasen (Dokumentazio Zentroaren arduraduna eta argitalpenaren koordinatzailea) testuak daude.

Liburua euskaraz eta gaztelaniaz argitaratu da, eta hasieran Fernando Illanaren ("Eguzkirik gabeko beste egun bat") eta Enrique Martínez Goikoetxearen ("JBS. Ohar biografikoak") testuak daude. Ondoren, Juncal Ballestín. Artxiboa liburuan Juncal Ballestínen eta hari buruzko testuen sorta bat agertzen da faksimile gisa: besteak beste Otro día sin sol, Reflexiones sobre una serie que empieza edo Tiempo para... para… eskuizkribuak, erakusketen katalogoetako testuak eta artistak berak eta Sara González de Aspuruk, José Ángel Artetxek, Daniel Castillejok edo Iñigo Sarriugartek sinatutako beste argitalpen batzuk.

Elena Roserasena da "Juncal Ballestinen ondare dokumentalaren babesa", eta testu horrek irekitzen du artistak diseinuaren hainbat arlotan egindako lanari eskainitako liburuaren atala. Hor aurkezten dira, adibidez, "Emakumearentzako sexualitate aske baten alde" kanpainarako, Vitoria-Gasteizko Nazioarteko Antzerki Jaialdirako, Denok edo La Farándula taldeen antzerki-proiektuetarako, Gasteizko eta Donostiako inauterietarako, rock eta musika klasikoko kontzertuetarako eta hainbat erakunderentzako egindako kartel eta lanen zirriborro ugari.

Espazio eszenikoarekin eta antzerki-jantziekin lotutako lanei buruzko kapitulu bat du Juncal Ballestín. Artxiboa liburuak, Denok Antzerki Ekoizpeneko Kooperatibarekin (1977 eta 1983 urteen artean Gasteizko Nazioarteko Antzerki Jaialdia antolatu zuena) eta La Farándula Antzerki Independenteko Konpainiarekin izandako lankidetzaren ondoriozkoak. Argitalpenak antzerki-agertokien zirriborro ugari aurkezten ditu, baita La Farándularen zenbait obratarako egindako jantzien diseinuak eta argazkiak ere.

Juncal Demarte enpresak egindako proiektuen zirriborroak, argazkiak eta bestelako dokumentu grafikoak ere biltzen ditu liburukiak. Juncal Demarte Ballestinek eta Marta Gonzálezek sortu zuten, bitxigintzako pieza apartak eta artisau-ekoizpeneko jantziak sortzeko.

Juncal Ballestin Artxiboari eskainitako liburua espazio publikoetarako pentsatutako eskultura-instalazioen hiru proiekturi buruzko artistaren dokumentazioaren zati batekin amaitzen da: 1992ko Sevillako Erakusketa Unibertsaleko bi kokalekutarako egin zituen El bosque de columnas eta Un laberinto eskulturena, Vitoria-Gasteizko Euskaltzaindia Plazarako egindako Un pequeño rito personal eskulturarena, eta Vitoria-Gasteizko Ajuria Egoitzarako egindako beste batena.

Juncal Ballestínen ondarea

Anesvad Fundazioak, Juncal Ballestínen legezko oinordekoak, 2021ean museoari dohaintzan emandako artistaren ondarearen inguruan Artium Museoko lan-taldeek egindako lanen esparruan kokatzen da Juncal Ballestín. Artxiboa. Dohaintzak 40 artelan baino gehiago eta arabar artistaren dokumentu multzo zabala biltzen du. Artelan eta dokumentu horietako asko urte horretan bertan egin zen Juncal Ballestín. Bizitza ariketa gisa erakusketan egon ziren ikusgai

Juncal Ballestínek garai hartan Bilboko Arte Ederren Goi Eskola deiturikoan egin zituen ikasketak, eta material, bitarteko eta teknika ugari (pintura, marrazketa, instalazioa, bideoa, obra grafikoa...) zerabilen sailetan egituratutako lan bat garatu zuen. Haren artelanak, zirriborro, gutun, argazki, kartel, prentsa-ebakin eta bestelako dokumentu batzuekin batera, Otazuko bere estudio-etxean zeuden gordeta, behar bezala antolatu eta sailkatuta.