Tabakalerak Andrea Canepa artistak sortu duen Situ-akzioak proiektuaren erakusketa berria inauguratu du. Inurri bideak du izenburua, eta inguruan idatzita dagoena irakurtzen ikasteko nahia du abiapuntu. Espazioak ez da hitzekin mintzatzen, baina markak, aztarnak eta arrastoak dauzka. Proposamen honek pertzepzioa eta arreta fintzera gonbidatzen gaitu, seinaleak irakurtzen ikasteko ez baitugu zertan haiek hitz bihurtu.

Inurriak arrasto kimikoen bidez orientatu eta erlazionatzen diren moduan inspiratuta, Inurri bideak erakusketak irudimen-ariketa bat proposatzen du, zentzumenetan oinarritutako beste kodetze-aukera batzuei bide emateko. Begiekin irakurri ezin diren mezuak dira; usaimenaren, ukimenaren eta larruazalaren bidez baizik.

Gurutzatu eta bitan banatzen diren bideen labirinto bat hartzen du erakusketa-aretoak. Ibilbide bakoitzak materialtasun eta testura propioak dauzka, eta norabideak, topaguneak edo desbideratzeak iradokitzen dituzten usain-arrasto sotilak jasotzen ditu. Publikoak erabakiak hartuko ditu, aurrera edo atzera egiteko modu desberdinak esploratuko ditu, eta gorputz-mugimenduaren bitartez espazioa esperimentatuko du.

Atalasea zeharkatzea, makurtzea, zorua oinekin igurztea edo gelditzea hizkera komun bakarra jolasa den leku honetan esperimentatzeko bideak dira.

Horretarako, Canepak hainbat material eta elementu fisikorekin lan egiten du bere instalazioetan; horien artean, oihalak eta ehunak, hariak eta zura nabarmentzen dira, baita egitura geometrikoak eta modularrak ere, barnebideak, atalaseak eta pasabideak osatzen dituztenak. Hala, elementu horiek konbinatuta, publikoak zeharkatu ahal izango duen ingurune eskultoriko eta espazial bat sortzen du Canepak.

Andrea Canepa

Andrea Canepak (Lima, 1980) instalazioaren, marrazkiaren, bideoaren eta ikerketa espazialaren bidez garatzen du bere lana, pertzepzio-sistemak, hizkuntza eta ezagutzaren transmisio-moduak ardatz hartuta. Interes berezia du esperientzia antolatzen duten egitura ikusezinetan, baita gorputza espazioan orientatzen den eta ikasten duen moduetan ere.

Nazioarteko erakundeetan aurkeztu izan du bere lana eta IVAMen, Condeduque Kultura Garaikidearen Zentroan eta Reina Sofía Arte Zentroaren Museo Nazionalean egindako erakusketetan parte hartu du. Gaur egun, Reina Sofia Museoak antolatutako Retiro Parkeko Kristalezko Jauregian bisita daiteke bere instalazio handienetako bat. Bere ikerketak arkitekturaren, pedagogiaren eta memoriaren arteko erlazioak jorratzen ditu, baita jolasaren, geometriaren eta ikaskuntza-prozesuen arteko loturak ere. Parte-hartze aktiboa bultzatzen duten dispositibo espazialen bidez, hezkuntza-sistemek, kode bisualek eta egitura sinbolikoek ingurunea bizitzeko eta ulertzeko moduan nola eragiten duten aztertzen du Canepak.

Situ-akzioak proiektua

Situ-akzioak 2018an jarri zen abian, adin guztietako publikoari arte garaikidea hainbat ikuspegitatik hurbiltzeko. Proiektu honek erakusketa-espazioekin interakzioan aritzeko modu alternatiboak proposatzen ditu, ikaskuntza-prozesuetan eta esperientzia estetikoan jolasak betetzen duen funtsezko zeregina aintzat hartuta.

Aurreko edizioetan 84.000 pertsonak baino gehiagok parte hartu dute proposamen hauetan, tartean Julio Le Parc eta Emma Kunz artistenak, baita artisten parte-hartzearekin ere, Priscila Fernandes, María Jerez eta Anna Irina Russell artistak kasu.

Jarduera paraleloak

Erakusketarekin batera, Tabakalerak saio dinamizatuak eskainiko ditu igandeetan, 11:00etan; parte hartzeko izena eman behar da aldez aurretik. Era berean, eskola-taldeentzako eta beste kolektibo batzuentzako jarduera espezifikoak programatuko dira goizetan, ohiko irekiera-ordutegitik kanpo.