Tabakaleraren "Helmuga amaigabea" kanpainak zilarrezko saria jaso du 2024ko estatuko sormen sarietan
MUY agentziak Tabakalerarentzat sortutako kanpaina esperientzia digital berritzailea da; artea, teknologia eta interaktibitatea uztartzen dituena. Zentroaren arabera, hainbat ilustratzailek "Helmuga amaigabea" kanpainan parte hartu izanak Tabakaleraren sorkuntzaren aldeko apustua narbarmentzen du.
| 2024ko Apirilaren 16a
Tabakalera kultura garaikideko nazioarteko zentroaren "Helmuga amaigabea" publizitate-kanpainak zilarrezko garaikurra jaso du 2024ko Sormen Sari ospetsuetan. MUY aholkularitza-enpresa estrategiko eta sormen-agentziak gauzatutako kanpaina berritzailea Eduki Digital Interaktiboa eta Craft Ilustrazioa kategorietan izendatu dute, eta zilarrezko saria jaso du azken atal horretan.
Otsailean eta martxoan zehar Estatu osoko publizitatearen sektoreko 35 profesional nabarmenek osatutako epaimahai batek mila pieza inguru aztertu ditu. "Helmuga amaigabea" kanpaina hautatutako 400 piezen artean nabarmendu da.
Kanpainak erabiltzaile-esperientzia interaktiboa eta hezitzailea eskaintzen du. Webgunearen bidez Tabakalerako hainbat arlo irudikatzen dituzten ilustrazio bektorialak esploratzeko aukera ematen die bisitariei. Zoom-infinitu teknologiak mundu ilustratu batetik bestera "bidaiatzea" ahalbidetzen die erabiltzaileei, zentroak arte garaikidetik eta musikatik hasi eta teknologia eta zinemaraino eskaintzen dituen jarduera eta diziplinen aberastasuna deskubrituz. Maialen Arocena, Raisa Alava, Higinia Garay, Marcos Navarro, 72 kilo, Javilostcontrol, Iván Delgado, Jabier Rodríguez, Ainhoa García Eizaguirre eta Pierpaolo Lampitelli ilustratzaileek parte hartu dute kanpainan.
"Helmuga amaigabea" bideoak 50 mila ikustaldi ditu Youtuben, eta Tabakalera sorkuntzaren eta kultura-topaketaren epizentro gisa islatzen du, baita artearen eta kulturaren berrikuntza digitalerako zubi gisa ere. Bisitariei beren gailu mugikorretatik edo tabletetatik sormen-mundu horiek esploratzea ahalbidetzen dienez, kanpaina interakzio digital kulturalaren abangoardian kokatzen da.
Sariak Donostian egin den zeremonia batean banatu dira, Club de Creativos-en 25. urteurrenaren ospakizunarekin bat eginez. Ekitaldi horrek Estatuko publizitate-industriaren onena biltzen du urtero.