Irailaren 20 eta 21ean, 50.000 baino gehiagoko bruggetarrek hartu zuten parte La Grande Araignée ("Armiarma Handia") izeneko ikuskizunean, Naoned hiriko (Bretainia) La Machine konpainiak sortutako Mekanika Jakintsuak sailaren pieza batean. Armiarma mekaniko erraldoi honek hiria zeharkatu zuen, etorkizuneko Brusk arte-zentroaren aurrerapen bat eskainiz (ikus irudia). Eskultura, antzerkia eta performancea uztartzen zituen gailu ikusgarri horrekin, museoko taldeak iradoki zuen nolakoa izango zen proiektua: herriari irekia, diziplina anitzetako arteak uztartuko zituena eta ondare kulturala sorkuntza garaikidearekin lotuko zituena.

Bisitariek eta ikusleek eraikina bera ere bisitatu ahal izan zuten, eta 13,5 metroko sabaia duten bi erakusketa-areto erraldoiak ezagutu.

Robbrecht & Daem eta Olivier Saelens arkitektoek diseinatutako eraikina da, 47,5 milioi euroko aurrekontuarekin —Brugge udalakak eta Flandriako Eskualdeak erabat finantzatua—, eta iraunkortasun eta energia-autonomiaren alorrean eredugarria izan nahi du. Bi hektareako gune berri batean kokatuko da, auzo historikoaren erdian.

Museoen auzo berri horrek Groeningemuseum berritua, museo-parke bat eta Bron izeneko ikerketa-zentroa ere hartuko ditu. Azken horretan bilduma zientifikoaren liburutegia eta paper gaineko lanen kontsulta gela egongo dira. Brusk eta Groeningemuseumaren erakusketa-aretoekin lotuta baina publikoarentzat itxita egongo den atzeko hegal logistiko batean Musea Bruggeko bildumaren kontserbazio, biltegiratze eta zaharberritzerako beharrezko ekipamendu modernoa kokatuko da, baita ikerketarako azpiegiturak ere.

Arnasa artistiko berria.

Museoen hiria eta museo-hiria den Bruggek 13 gune eta monumentu ezberdin ditu, eta urtero ia milioi bat bisitari hartzen ditu, horietatik %80 atzerritarrak. Arte-gune berriak sare horren katalizatzaile izan nahi du, hiriaren bildumak balioan jarriz erakusketa berritzaile, diziplina anitzeko eta zeharkakoen bidez, XIV. mendetik gaur arteko artea ekarriz.

Espazio berri honek museoek gero eta gehiago hartu duten joeran kokatzen da: kultura-erakarpen bihurtzea. Erakusketa-aretoak ez dira jada elementu bakarra; eraikuntza ireki eta gardena, hala nola bere ezkaratza eta taberna, hiriaren bihotzean topagune eta igarobide gune gisa pentsatu dira.

Brusk zentroak urtean 200.000 bisitari inguru erakartzea aurreikusten du. Bron 2025eko azaroaren 19an irekiko bada ere, arte-zentroak 2026ko maiatzaren 8an zabalduko ditu ateak lehen erakusketarekin, historia eta kultura uztartuko dituena Brugge hiria ardatz hartuta, eta artista garaikide baten lan digitalari eskainitako beste bat; halaber, modaren eta arte garaikidearen arteko topaketari buruzko erakusketa bat ere egongo da.

Proiektua, oro har, begi onez hartua izan omen da, baina batzuek aurrekontua gainditzeko arriskua aipatzen dute; arte-komunitatearen barruan, beste batzuek espero dute erakusketa handi horiek ez izatea flandriar edo ibilbide laburragoko artisten kalterako.