Tabakalerak Strong back, soft front inauguratu du, bere erakusketa-urtea abiatzen duen proiektua. Maite González Martínez artistaren bakarkako erakusketa da, Iñigo Villafranca Apesteguia komisario duena, eta gaurtik martxoaren 15era arte dago ikusgai Tabakalerako 2. erakusketa-aretoan.

Maite González Martínezen artxibo pertsonaleko irudien hautaketa biltzen du proiektuak. Bideo eta collagen bidez, gaur egungo irudien kontsumo azkar eta ia automatikoarekin kontraste nabarmena eskaintzen du. Strong back, soft front erakusketan, Gonzálezek begiratzeko beste modu bat proposatzen du; erakusketako piezek eszena sinpleen behaketa patxadatsu eta arretatsua egitera gonbidatzen dute, eta agerian uzten dute normalean oharkabean pasatzen dena. Behaketaren ahalmena azpimarratzen du, munduarekin zein inguratzen gaituzten pertsonekin dugun harremana hobeto ulertzen lagunduko digun praktika gisa.

Erakusketa lau bideoinstalaziok (Nigthwish, Triptikoa, Loreblume eta Le monde paisible), hainbat collagek eta Flipbook-ek, segidan jarritako irudiz osatutako liburu txikiak, osatzen dute. Azken horretan, irudiek azkar pasatzean mugimendu-ilusioa sortzen dute, oinarrizko animazioa sortuz. Argitalpen horrek lotura egiten du liburuko irudien eta erakusketako bi bideoinstalazioen artean, eta Tabakalerako espresuki sortu da.

Iñigo Villafranca Apesteguia komisarioak eta Maite González Martínez artistak elkarlanean sortu duten erakusketa Tabakaleraren komisariotza egonaldi deialdiaren emaitza da. Programa horrek tokiko komisarioei eta artistei laguntzen die, eta haien proiektuak zentroaren urteko programazioan txertatzen ditu.

Biografiak

Maite González Martínezek (Oiartzun, 1995) irudian zentratzen du bere praktika artistikoa, lotura anitz egiteko. Arte Ederretan graduduna da EHUn eta Pintura Masterra ere EHUn egin zuen. 2024an APP/PAP Arte Performatiboen Programan parte hartu zuen; Tabakaleraren babesa izan zuen eta Beatriz Setiének zuzendu zuen. Egonaldi artistikoak egin ditu CCA Glasgow - Hospitalfield-en, Tabakalerak bultzatuta, (2024) eta Reinosako Cuevas Celestino Erresidentzien Programan (2024). Gaur egun, prestakuntza-beka bat garatzen ari da Gordailuan, erregistroaren eta dokumentazioaren arloan.

Hainbat erakusketatan parte hartu du: XL Muestra de Arte Joven de la Rioja (2024) Argi urdin arrosa laranja (2024), Irantzu Yaldeberen komisariotza Oxford Aretoan, Eremuaken HARRIAK programaren barruan, Beginning of a new world (2022) Fabryka Sztukiren (Polonia), Ni naiz kariño ta zu zare maitia (2020) Auritz Iñurrietarekin batera eta KEAK (LUR HARTU) DU kolektiboan Aire galerian, besteak beste.

Iñigo Villafranca Apeztegia (Valtierra, 1994) komisarioa eta ikertzailea da. Bere ibilbidean giza harremanen konplexutasunari heldu izan dio. Bere ikerketa-lerro nagusiak harreman-estetikak, irudia, paisaia eta utopia dira. Nazioarteko Harremanetan graduduna da eta Kultur Kudeaketan Masterra du; komisariotzara eta ikerketa artistikora bideratu du bere prestakuntza. Villafranca Kultur Ikasketak eta Lurraldea Unibertsitate Espezialista da eta gaur egun Arte Garaikideko Ikerketan Doktoretza egiten ari da EHUn. Duela gutxi komisariatu ditu, besteak beste, honako erakusketa hauek: Resbalar (una cosa) (Can Felipa, Bartzelona, 2024), Regalar es derretir (Encuentros de Pamplona, 2024), Nadie puede compartir el sabor de la menta (BilbaoArte Fundazioa, 2024) edo Outstretched y OST O))) (Ex, L'Hospitalet de Llobregat, 2025). 2021etik EZPROGUI arte eta ikerketa proiektua zuzentzen du.